Rashmika Mandanna | సినిమాలమీద సినిమాలు సైన్ చేసుకుంటూ, విజయాలపై విజయాలు సాధిస్తూ టాప్గేర్లో దూసుకుపోతున్నది రష్మిక. ప్రస్తుతం ఆమె నటించిన ‘యానిమల్’ ఓ సంచలనం. అందులో రష్మిక నటన గురించి ప్రత్యేకంగా మాట్లాడుకుంటున్నారు. ఇప్పటివరకూ గ్లామర్ డాల్గా మాత్రమే అలరించిన నేషనల్ క్రష్.. తొలిసారి అభినయతారగా కూడా అలరించిందంటూ విమర్శకులు సైతం ప్రశంసలు కురిపిస్తున్నారు.
ఇక రష్మిక నటిస్తున్న సినిమాల విషయానికొస్తే.. ‘పుష్ప-2’ షూటింగ్ ప్రస్తుతం జరుగుతున్నది. అందులో ‘శ్రీవల్లి’గా మరోసారి మురిపించనున్నది రష్మిక. మరోవైపు గీతా ఆర్ట్స్ నిర్మిస్తున్న ‘ది గర్ల్ఫ్రెండ్’ ఉండనే ఉంది. త్వరలో మరో సినిమా ఎనౌన్స్మెంట్ కూడా రానుంది. ఈ విధంగా శరవేగంగా సినిమాలు చేసుకుంటూ ముందుకెళ్తున్నది రష్మిక. తాను చేయబోతున్న పాత్రలు, సినిమాల గురించి ఇటీవల రష్మిక మాట్లాడుతూ ‘అవకాశాలు వస్తున్నాయి కదా అని ఏ సినిమా పడితే ఆ సినిమా చేయను. కథ నచ్చాలి. పాత్ర నచ్చాలి. పనిచేసే వ్యక్తులు నచ్చాలి. ఆ తర్వాతే రెమ్యునరేషన్. నా అదృష్టం బావుంది. మంచి సినిమాలు వస్తున్నాయి. ముఖ్యంగా ‘యానిమల్’ సినిమా ఇచ్చిన ఆనందాన్ని మాటల్లో చెప్పలేను. నటిగా నా ఆకలి తీర్చిన సినిమా అది’ అని చెప్పుకొచ్చింది రష్మిక.