‘ఆర్‌ఆర్‌ఆర్‌’ సీక్వెల్‌ కోసం..

ఎన్టీఆర్‌, రామ్‌చరణ్‌ కథానాయకులుగా రాజమౌళి దర్శకత్వంలో రూపొందిన ‘ఆర్‌ఆర్‌ఆర్‌' చిత్రం ప్రపంచవ్యాప్తంగా ప్రేక్షకుల ఆదరణ సొంతం చేసుకుంది.

ఎన్టీఆర్‌, రామ్‌చరణ్‌ కథానాయకులుగా రాజమౌళి దర్శకత్వంలో రూపొందిన ‘ఆర్‌ఆర్‌ఆర్‌’ చిత్రం ప్రపంచవ్యాప్తంగా ప్రేక్షకుల ఆదరణ సొంతం చేసుకుంది. ఈ సినిమాలోని ‘నాటు నాటు’ పాట ఆస్కార్‌ పురస్కారాన్ని గెలుచుకొని తెలుగు సినిమా ఖ్యాతిని విశ్వవేదికపై ఘనంగా చాటింది.

ఈ సినిమాకు సీక్వెల్‌ రాబోతున్నదని దర్శకుడు రాజమౌళి తండ్రి, చిత్ర రచయిత విజయేంద్రప్రసాద్‌ కొద్ది రోజుల క్రితం వెల్లడించిన విషయం తెలిసిందే. ఈ సీక్వెల్‌కు చంద్రశేఖర్‌ యేలేటి దర్శకత్వం వహిస్తారని వార్తలు వినిపించాయి. తాజాగా ఇప్పుడు మరో కొత్త దర్శకుడి పేరు బయటికొచ్చింది. దేవా కట్టా ఈ సినిమాకు సెకండ్‌ యూనిట్‌ దర్శకుడిగా పనిచేస్తాడని, ప్రధాన దర్శకుడిగా రాజమౌళి బాధ్యతలు నిర్వహిస్తారని సమాచారం. అయితే ఈ సీక్వెల్‌కు ఇంకా చాలా సమయం ఉందని, మరికొన్ని మాసాల తర్వాతే దర్శకుడి విషయంలో స్పష్టత వస్తుందంటున్నారు.