న్యూయార్క్: అమెరికా పాప్ సింగర్ ఆర్ కెల్లీ లైంగిక వేధింపుల కేసులో దోషిగా తేలాడు. మొత్తం తొమ్మిది కేసుల్లో ఆయన్ను దోషిగా తేల్చారు. సెక్స్ క్రైం రింగ్ను నడిపినట్లు ఆయనపై ఆరోపణలు ఉన్నాయి. ఆరు వారాల పాటు విచారణ తర్వాత కోర్టుకు ఈ నిర్ణయానికి వచ్చింది. చాలా వ్యూహాత్మక పద్ధతిలో మహిళలు, టీనేజర్లను రిక్రూట్ చేసి వారిని శృంగారం కోసం వినియోగించినట్లు కెల్లీపై ఆరోపణలు ఉన్నాయి. ఆ తర్వాత ఆ మహిళల్ని అత్యంత దారుణంగా శారీరకంగా వేధించినట్లు తెలుస్తోంది. సూపర్స్టార్ హోదాలో ఉన్న కెల్లీ, తన హోదాతో మహిళల్ని వంచించినట్లు కోర్టు తెలిపింది. ఈ కేసులో తుది తీర్పును కోర్టు వచ్చే ఏడాది మే నెలలో వెలువరించనున్నది.
వేధింపుల కేసులో కెల్లీకి జీవితకాల శిక్ష పడే ఛాన్సు ఉంది. రాబర్ట్ సిల్వస్టర్ కెల్లీ ఓ రింగ్లీడర్ తరహాలో స్కీమ్ను నడిపి, మహిళలను లైంగికంగా వేధించినట్లు కోర్టు తెలిపింది. ఐ బిలీవ్ ఐ కెన్ ఫ్లై అన్న పాటతో ఫేమస్ అయిన సింగర్ కెల్లీ.. మహిళలను ట్రాఫికింగ్ చేసినట్లు ఆరోపణలు ఉన్నాయి. చైల్డ్ పోర్నోగ్రఫీ వీడియోలు తీసినట్లు కూడా కెల్లీపై కేసులు ఉన్నాయి. కెల్లీతో పనిచేసిన మేనేజర్లు, సెక్యూర్టీ గార్డులు, ఇతర సభ్యులు ఎలా మహిళలను ఊబిలోకి దింపేవారో కోర్టు విచారణలో ప్రాసిక్యూటర్లు తెలిపారు. కెల్లీ తనను బంధించి, డ్రగ్స్ ఇచ్చి, రేప్ చేశాడని ఓ మహిళ లిఖితపూర్వక ఫిర్యాదు కూడా చేసింది.