Priyanka chopra | విలన్‌గానే ఇష్టపడుతున్నారు

విధిపై నమ్మకంతో పాటు కష్టపడేతత్వమే అన్ని భాషల్లో తనకు గొప్ప అవకాశాల్ని తెచ్చిపెడుతున్నదని చెబుతోంది ప్రియాంకచోప్రా. కెరీర్‌ పరంగా సుదూర లక్ష్యాల్ని విధించుకున్న తాను వాటి సాధన కోసం ఎన్నో త్యాగాలు చేశానని అంటోంది. తన వ్యక్తిగత జీవితంతో పాటు సినీ ప్రయాణంలో ఎదురైన ఎత్తుపల్లాల గురించి ప్రియాంకచోప్రా మాట్లాడుతూ ‘ లైఫ్‌లో ఎన్నో ఓటమిలు, అవమానాల్ని ఎదురొన్నా. వివక్ష, తిరస్కరణల్ని చవిచూశా. సమస్య ఎదురైన ప్రతిసారి కుటుంబసభ్యులే నాలో ధైర్యాన్ని నింపారు. వారి సహకారం వల్లే హాలీవుడ్‌ వరకు ప్రయాణించగలిగా. కష్టపడేతత్వం ఉన్నవారికి ఎక్కడైనా అవకాశాలుంటాయని నేను విశ్వసిస్తా. ప్రతి చోట ఆ సిద్ధాంతాన్నే అనుసరిస్తా’ అని తెలిపింది. హాలీవుడ్‌లో ఎక్కువగా నెగెటివ్‌ షేడ్స్‌తో కూడిన పాత్రల్లో నటించడాన్ని గురించి చెబుతూ ‘విలన్‌గానే నన్ను ప్రేక్షకులు ఇష్టపడుతున్నారని అనుకుంటున్నా. ప్రతి ఒక్కరిలో మంచి, చెడు లక్షణాలుంటాయి. అవసరానికి అనుగుణంగా అవి బయటికొస్తాయి. వెండితెరపై నాలోని మంచి కంటే చెడు గుణమే అందరికి నచ్చుతుంది’ అని చెప్పింది.