Visit:
Peddi | మెగా పవర్ స్టార్ రామ్ చరణ్ హీరోగా, దర్శకుడు బుచ్చిబాబు సానా తెరకెక్కించిన ‘పెద్ది’ చిత్రం బాక్సాఫీస్ వద్ద విజయవంతంగా దూసుకుపోతోంది. విడుదలైన మొదటి రోజు నుంచే ప్రేక్షకుల నుంచి మంచి స్పందన అందుకున్న ఈ సినిమా ప్రపంచవ్యాప్తంగా భారీ వసూళ్లను రాబడుతూ బ్లాక్బస్టర్ విజయంగా నిలిచింది. ట్రేడ్ వర్గాల అంచనాల ప్రకారం ఈ చిత్రం ఇప్పటికే రూ.400 కోట్లకు పైగా గ్రాస్ వసూళ్లను సాధించి సెన్సేషన్ క్రియేట్ చేసింది. ఈ భారీ విజయాన్ని పురస్కరించుకుని చిత్ర యూనిట్ ఈరోజు హైదరాబాద్లో గ్రాండ్ సక్సెస్ మీట్ నిర్వహించేందుకు సిద్ధమైంది. ముఖ్యంగా ఈ కార్యక్రమానికి మెగాస్టార్ చిరంజీవి ముఖ్య అతిథిగా హాజరుకానుండటం మెగా అభిమానుల్లో భారీ ఉత్సాహాన్ని తీసుకొచ్చింది.
హైదరాబాద్లోని శిల్పకళా వేదికలో ఈరోజు సాయంత్రం 6 గంటల నుంచి ‘పెద్ది’ సక్సెస్ సెలబ్రేషన్స్ ప్రారంభం కానున్నాయి. ఈ వేడుకలో మెగాస్టార్ చిరంజీవితో పాటు హీరో రామ్ చరణ్, దర్శకుడు బుచ్చిబాబు సానా, నిర్మాతలు మరియు చిత్ర యూనిట్ సభ్యులు పాల్గొననున్నారు.ముఖ్యంగా తండ్రి-కొడుకులు చిరంజీవి, రామ్ చరణ్ ఒకే వేదికపై అభిమానులను ఉద్దేశించి మాట్లాడనున్న నేపథ్యంలో ఈ కార్యక్రమంపై ప్రత్యేక ఆసక్తి నెలకొంది. మెగా అభిమానులు ఈ ఈవెంట్ కోసం ఎంతో ఆసక్తిగా ఎదురుచూస్తున్నారు. ‘పెద్ది’ చిత్రంలో రామ్ చరణ్ పవర్ఫుల్ పాత్రలో కనిపించి ప్రేక్షకులను ఆకట్టుకున్నారు. ఆయన నటన, భావోద్వేగ సన్నివేశాలు, యాక్షన్ ఎపిసోడ్స్ సినిమాకు ప్రధాన బలంగా నిలిచాయని అభిమానులు, సినీ విశ్లేషకులు అభిప్రాయపడుతున్నారు.
ఇక హీరోయిన్ జాన్వీ కపూర్ తన పాత్రకు న్యాయం చేయగా, కన్నడ స్టార్ శివ రాజ్కుమార్, బాలీవుడ్ నటుడు దివ్యేందు శర్మ, సీనియర్ నటుడు జగపతి బాబు, బొమన్ ఇరానీ తదితరులు తమ పాత్రలతో సినిమాకు మరింత బలం చేకూర్చారు. ఈ చిత్రానికి ఆస్కార్ అవార్డు గ్రహీత ఏఆర్ రెహమాన్ సంగీతం అందించారు. పాటలు, బ్యాక్గ్రౌండ్ స్కోర్ ప్రేక్షకులను ఆకట్టుకోవడంతో పాటు సినిమాకు మరింత గ్రాండియర్ను తీసుకొచ్చాయి. ముఖ్యంగా భావోద్వేగ సన్నివేశాల్లో రెహమాన్ సంగీతం ప్రత్యేక ఆకర్షణగా నిలిచిందని అభిమానులు చెబుతున్నారు. ‘ఉప్పెన’ తర్వాత బుచ్చిబాబు సానా తెరకెక్కించిన ఈ చిత్రం ఆయన కెరీర్లో మరో భారీ విజయంగా నిలిచింది. భారీ కథాంశం, భావోద్వేగాలు, కమర్షియల్ అంశాలను సమతూకంగా మేళవించిన దర్శకుడి పనితీరుకు ప్రశంసలు దక్కుతున్నాయి. ‘పెద్ది’ విజయోత్సవ వేడుకలో చిరంజీవి, రామ్ చరణ్ ఒకే వేదికపై కనిపించనుండటంతో మెగా అభిమానుల్లో పండుగ వాతావరణం నెలకొంది. ఈ కార్యక్రమంలో మెగాస్టార్ సినిమా గురించి ఏమి మాట్లాడతారు? రామ్ చరణ్ తన విజయాన్ని ఎలా పంచుకుంటారు? అనే ఆసక్తి అందరిలో కనిపిస్తోంది.
