అగ్ర హీరో పవన్కల్యాణ్ పాటలు పాడటం కొత్తేమీ కాదు. తమ్ముడు, ఖుషి, జాని, గుడుంబా శంకర్, అత్తారింటికి దారేది వంటి చిత్రాల్లో ఆయన తన గాన కౌశలంతో అభిమానుల్లో జోష్ను నింపారు. తాజా చిత్రం ‘ఓజీ’ కోసం పవన్కల్యాణ్ మరోమారు గొంతు సవరించుకోవడానికి సిద్ధమవుతున్నట్లు తెలిసింది. సుజీత్ దర్శకత్వంలో గ్యాంగ్స్టర్ డ్రామాగా ఈ చిత్రాన్ని తెరకెక్కిస్తున్నారు. ప్రస్తుతం చిత్రీకరణ జరుగుతున్నది. ఈ సినిమాలో కథానుగుణంగా పవన్కల్యాణ్తో ఓ పాట పాడించే అవకాశం ఉందని సంగీత దర్శకుడు తమన్ వెల్లడించారు.
దీంతో మరోమారు పవన్కల్యాణ్ గళం నుంచి మాంచి హుషారైన పాట వినొచ్చని అభిమానులు సంబరపడిపోతున్నారు. ‘ఓజీ’ చిత్రాన్ని జపాన్-ముంబయి నేపథ్య కథాంశంతో తెరకెక్కిస్తున్నట్లు తెలిసింది. కొద్ది మాసాల క్రితం విడుదల చేసిన ఈ సినిమా గ్లింప్స్ అంచనాలను పెంచింది. ప్రియాంక అరుళ్ మోహన్ కథానాయికగా నటిస్తున్న ఈ చిత్రంలో ఇమ్రాన్ హష్మీ, అర్జున్దాస్, శ్రియా రెడ్డి, ప్రకాష్ రాజ్ తదితరులు కీలక పాత్రలను పోషిస్తున్నారు.