అలాంటి నటుడు ఆమిర్‌ ఒక్కరే

ఆమిర్‌ఖాన్‌ నటించిన కొత్త సినిమా ‘లాల్‌ సింగ్‌ చడ్డా’. తెలుగులో చిరంజీవి సమర్పణలో ఈ సినిమా ఆగస్ట్‌ 11న విడుదలకు సిద్ధమవుతున్నది. ఈ చిత్రంలో కరీనా కపూర్‌ నాయికగా నటించగా..నాగ చైతన్య కీలక పాత్రను పోషించారు. తాజాగా ఈ చిత్ర ప్రెస్‌మీట్‌ను హైదరాబాద్‌లో నిర్వహించారు.

ఈ సందర్భంగా ఆమిర్‌ ఖాన్‌ మాట్లాడుతూ…‘మా సినిమాకు సమర్పకులుగా వ్యవహరిస్తున్నందుకు చిరంజీవి గారికి కృతజ్ఞతలు. ఒక మంచి చిత్రాన్ని తెలుగు ప్రేక్షకుల ముందుకు తీసుకొచ్చేందుకు ఆయన సహకారం ఎంతో అవసరం.

కొద్ది వారాల కిందట ఆయన్ను కలిసి సినిమా చూడాలని కోరాను. చిరంజీవి అంగీకరించి సినిమా చూశారు. ఆయన ప్రజెంటర్‌గా ఉంటానని చెప్పడం సంతోషాన్ని కలిగించింది. ఇవాళ తెలుగు, తమిళ, కన్నడ, మలయాళ చిత్రాలు హిందీలో గొప్ప ఆదరణ పొందుతున్నాయి. అలాగే మేము తెలుగు ప్రేక్షకులకు చేరువ కావాలని ప్రయత్నిస్తున్నాం’ అన్నారు. చిరంజీవి మాట్లాడుతూ…‘ఆమిర్‌ఖాన్‌ ఫోన్‌ చేసి ‘లాల్‌ సింగ్‌ చడ్డా’ గురించి చెప్పినప్పుడు ఈ సినిమాను సమర్పించడం ఒక గౌరవంగా భావించాను.

ఒక సినిమా కోసం, పాత్ర కోసం ఆమిర్‌ పడే తపనకు నిదర్శనం ఈ సినిమా. 14 ఏళ్లు ఒక రీమేక్‌ కోసం వేచి చూడటం ఆయన వల్లే సాధ్యమైంది. ఇలాంటి నటుడు దేశంలో ఆమిర్‌ఖాన్‌ ఒక్కడేనని చెప్పగలను. మనమంతా గర్వపడే నటుడు ఆయన.

ప్రతి సినిమా వైవిధ్యంగా ఉండాలని ప్రయత్నిస్తుంటారు. ఈ సినిమాలో నేనూ భాగమైనందుకు సంతోషంగా ఉంది’ అన్నారు. నాగ చైతన్య మాట్లాడుతూ…‘ఆమిర్‌ఖాన్‌ సినిమాలు చూస్తూ పెరిగాను. ఇవాళ ఆయనతో కలిసి నటించడం ఎంతో గర్వంగా అనిపిస్తున్నది. ఈ సినిమా చిత్రీకరణ సమయంలో ఆమిర్‌ఖాన్‌ నుంచి ఎన్నో విలువైన విషయాలు నేర్చుకున్నాను. అవి జీవితాంతం నాకు గుర్తుంటాయి’ అన్నారు.