Telugu Movies | మాములుగా సినిమా రిలీజ్లు పండగ టైమ్ను లాక్ చేసుకుంటుంటాయి. ఎందుకంటే సినిమా యావరేజ్గా ఉన్నా సరే.. పండగ కాబట్టి ఫ్యామిలీ ఆడియెన్స్ థియేటర్లకు వచ్చే చాన్స్ ఉంటుంది. దాంతో కంటెంట్ పెద్దగా లేకపోయినా.. ఈజీగా బ్రేక్ ఈవెన్లు అవుతుంటాయి. ఇప్పటికే ఎన్నో సార్లు అది రుజువైంది కూడా. మరీ ముఖ్యంగా తెలుగు సినిమాలు ఆరేడు నెలల ముందే దసరా, సంక్రాంతి వంటి పండగలపై ఖర్చీఫ్లు వేసుకుంటుంటారు. ఇక మీడియం బడ్జెట్ సినిమాలు ఉగాది, వినాయక చవితి, దీపావళి వంటి పండగలను టార్గెట్గా పెట్టుకుంటాయి. అయితే ఈ ఏడాది వినాయక చవితికి అనూహ్యంగా ఒక్క తెలుగు సినిమా కూడా రిలీజ్ కావడం లేదు.
నిజానికి ఈ సారి వినాయక చవితి సినిమా రిలీజ్లకు పుష్కలంగా కలిసొచ్చింది. ఎందుకంటే వినాయక చవితి ఈ సారి సోమవారం వస్తుంది. అంటే వీకెండ్తో కలుపుని మొత్తం మూడు హాలీడేస్ వస్తున్నాయి. నిజానికి ఇది చాలా మంచి వీకెండ్. సినిమా కాస్త పాజిటీవ్ టాక్ తెచ్చుకున్నా కలెక్షన్లు మోత మోగిపోయే చాన్స్ ఉంటుంది. కానీ ఇంత మంచి అవకాశాన్ని తెలుగు సినిమాలు మిస్ చేసుకున్నాయి. ముందుగా స్కంద ఈ లాంగ్ వీకెండ్పైనే ఖర్చీఫ్ వేసింది. కానీ అనూహ్యంగా సలార్ పోస్ట్ పోన్ అవడంతో సెప్టెంబర్ 28న వస్తుంది. దాంతో చంద్రముఖి-2, మార్క్ ఆంటోని వంటి అరవ సినిమాలు మాత్రమే రిలీజవుతున్నాయి.
అందులోనూ చంద్రముఖి-2 సీజీ వర్క్ ఇంకా పూర్తి కాలేదట. దాంతో వినాయక చవితికి రావడం కష్టమే అని చెన్నై టాక్. అంటే ఈ సారి వినాయక చవితికి కేవలం మార్క్ ఆంటోని సినిమా మాత్రమే రిలీజవుతుంది. ఇప్పటికే ఈ సినిమా ట్రైలర్కు పిచ్చ క్రేజ్ వచ్చింది. అదే రేంజ్లో సినిమా ఉంటే మాత్రం విశాల్ ఈ సారి భారీ రేంజ్ హిట్టు కొట్టడం ఖాయం. ఇదే జరిగితే మట్టుకు తెలుగు మేకర్స్ మాత్రం భారీ మూల్యం చెల్లించుకున్నట్లే. అసలింత మంచి లాంగ్ వీకెండ్ను మనవాళ్లు ఎలా మిస్ చేసుకున్నారని పలువురు నెటిజన్లు కామెంట్స్ చేస్తున్నారు.
ఇక నిన్న రిలీజైన మిస్ శెట్టి, జవాన్ సినిమాలకు కూడా వినాయక చవితి బాగానే కలిసొచ్చే చాన్స్ ఉంది. ఎలాగూ ఈ మధ్యలో మంచి హైప్ ఉన్న సినిమాలు రిలీజ్ కావడం లేదు. దాంతో ఈ రెండు సినిమాలకు బాగా కలిసొస్తుంది.