సినిమారంగంలో అగ్రస్థానంలో ఉన్నవాళ్లకు ఇచ్చే టైటిల్ ‘సూపర్స్టార్’. హీరోహీరోయిన్ల పోరాటమంతా ఈ టైటిల్ కోసమే అని చెప్పాలి. విశేషమేంటంటే నయనతారను ఈ టైటిల్ వరించింది. ఆమె పేరు ముందట ‘లేడీ సూపర్స్టార్’ అనే ట్యాగ్ తగిలించేశారు అభిమానులు. గతంలో ఈ టైటిల్ విజయశాంతికి ఉండేది. అయితే, నయన్కు మాత్రం ‘లేడీ సూపర్స్టార్’ అని పిలిపించుకోవడం ఇష్టంలేదంట. ఇటీవల ఓ ఇంటర్వ్యూలో పాల్గొన్న నయన్ తనని ‘సూపర్స్టార్’ అని పిలవడంపై స్పందించింది.
‘ దయచేసి సూపర్స్టార్ అని పిలవకండి. అలా పిలిస్తే నాకు నచ్చదు. పైగా ఎవరైనా అలా పిలిస్తే తిట్టినట్టు అనిపిస్తుంది’ అంటూ నిర్మొహమాటంగా చెప్పేసింది నయన్. ఇంకా మాట్లాడుతూ ‘ ‘జవాన్’ తర్వాత ఇలా పిలవడం మరీ ఎక్కువైంది. అభిమానులనుంచి ఇంత ప్రేమాభిమానాలు పొందగలగడం నా అదృష్టం. వారి అభిమానాన్ని వెలకట్టలేం. ఈ సూపర్స్టార్ అనే బిరుదులు దాని ముందు చాలా స్వల్పమైనవి. ఇంతమంది అభిమానుల్ని నాకిచ్చిన ఫిలింఇండస్ట్రీకి ఎప్పటికీ నేను రుణగ్రస్తురాలినే. ఇదంతా నా అదృష్టం’ అంటూ ఎమోషనల్గా మాట్లాడింది నయనతార.