‘నారప్ప’..కొత్త అనుభూతి

‘35 ఏళ్ల సుదీర్ఘ సినీ ప్రయాణంలో ఎన్నో సవాళ్లతో కూడిన పాత్రలు పోషించాను. ‘నారప్ప’ మాత్రం నా కెరీర్‌లో వైవిధ్యమైన సినిమాగా నిలిచింది’ అని అన్నారు వెంకటేష్‌. ఆయన కథానాయకుడిగా నటించిన చిత్రం ‘నారప్ప’. సురేష్‌బాబు, కలైపులి ఎస్‌ థాను ఈ చిత్రాన్ని నిర్మించారు. శ్రీకాంత్‌ అడ్డాల దర్శకుడు. ఇటీవల అమెజాన్‌ ప్రైమ్‌ ద్వారా ఈ చిత్రం విడుదలైంది. శుక్రవారం హైదరాబాద్‌లో విజయోత్సవ వేడుకను నిర్వహించారు. ఈ సందర్భంగా వెంకటేష్‌ మాట్లాడుతూ ‘నటుడిగా నాకు సరికొత్త అనుభూతిని పంచిన చిత్రమిది. ధనుష్‌, వెట్రిమారన్‌ కలిసి ‘అసురన్‌’ చేసుండకపోతే ఈ సినిమా ఉండేది కాదు. తెలుగు ఆడియెన్స్‌కు కొత్తదనాన్ని అందించాలనే ఆలోచనతో రీమేక్‌ చేశాం. కుటుంబ సన్నివేశాల్లోని ఆర్ధ్రత ప్రేక్షకుల్ని ఆకట్టుకుంటున్నది. ఓటీటీలో విడుదల కావడం బాధను కలిగించినా ప్రతి ఒక్కరూ సినిమాను ఆదరిస్తున్నారు’ అని తెలిపారు. అనిల్‌ రావిపూడి మాట్లాడుతూ ‘విలక్షణ కథాంశాలతో వెంకటేష్‌ సినిమాలు చేస్తుంటారు. నారప్ప పాత్రలో ఆయన జీవించారు’ అని చెప్పారు. గ్రామీణ ప్రాంతాల వారిని ఈ సినిమా అలరిస్తోందని దర్శకుడు శ్రీకాంత్‌ అడ్డాల అన్నారు. సినిమా కోసం టీమ్‌ పడిన కష్టం ఫలించిందని సురేష్‌బాబు పేర్కొన్నారు. ఈ కార్యక్రమంలో ప్రియమణి, కార్తిక్త్న్రం తదితరులు పాల్గొన్నారు.