నాజూకు నవ్వులోన జారుకత్తి

‘అనుబంధాల ఆలంబనతో అల్లుకున్న అందమైన పొదరిల్లు ఆ కుటుంబం. అన్నదమ్ములిద్దరికి అమ్మంటే ప్రాణం. తనయుల్ని చూసి అభినవ రామలక్ష్మణులని మురిసిపోతుంటుంది. అయితే అనుకోకుండా వారిమధ్య మనస్పర్థలొస్తాయి. బాధ్యతల్ని భుజానికెత్తుకున్న ఆ తమ్ముడు తిరిగి ప్రేమాభిమానాలు వెల్లివిరిసేలా ఆ కుటుంబాన్ని ఎలా తీర్చిదిద్దాడనే అంశాల్ని మా సినిమాలో వినోదం, భావోద్వేగాల మేళవింపుతో చూపించాం’ అన్నారు శివ నిర్వాణ. ఆయన దర్శకత్వంలో నాని హీరోగా నటించిన చిత్రం ‘టక్‌ జగదీష్‌’. రీతూవర్మ, ఐశ్వర్యరాజేష్‌ కథానాయికలు. జగపతిబాబు కీలక పాత్రధారి. ఈ నెల 10న అమెజాన్‌ ప్రైమ్‌లో విడుదల కానుంది. శుక్రవారం గోపీసుందర్‌ స్వరసారథ్యంలో చిత్రంలోని ‘టక్‌ పాట’ను విడుదల చేశారు. ‘సల్లాటి కుండలో సల్లసక్క మనసువాడు..నువ్వు గిల్లిగిచ్చి రెచ్చగొడితే దంచుతాడు…నాజూకు నవ్వులోన జారుకత్తి పదును చూడు’ అంటూ జానపదశైలిలో ఈ పాట సాగింది. ఈ గీతాన్ని దర్శకుడు శివ నిర్వాణ ఆలపించారు. నాని పాత్ర చిత్రణలో మాస్‌, క్లాస్‌ అంశాలన్నీ ఉంటాయని చిత్రబృందం తెలిపింది. ఈ చిత్రానికి సినిమాటోగ్రఫీ: ప్రసాద్‌ మూరెళ్ల, సంగీతం: ఎస్‌.తమన్‌, గోపీసుందర్‌, నిర్మాతలు: సాహుగారపాటి, హరీష్‌ పెద్ది.