ఆరు పదుల వయస్సులో కూడా కుర్రహీరోలు సైతం షాక్ అయ్యేలా ఫుల్ ఎనర్జీతో బ్యాక్ టు బ్యాక్ సినిమాలు చేస్తూ ముందుకెళ్తున్నాడు స్టార్ హీరో మోహన్లాల్ (Mohanlal). తెలుగు, తమిళం, మలయాళ, కన్నడ భాషల్లో సినిమాలు చేస్తూ కోట్లాదిమంది అభిమానులను సంపాదించుకున్నాడు. ఈ స్టార్ హీరో గతేడాది మాన్స్టర్ సినిమాతో ప్రేక్షకుల ముందుకు రాగా.. ఆశించిన స్థాయిలో ఆడలేకపోయింది.
ఇక ఈ ఏడాది రిపబ్లిక్ డే సందర్భంగా ఎలోన్ (Alone) సినిమాతో మోహన్లాల్ అందరినీ పలుకరించాడు. అయితే తొలి రోజే ఈ సినిమాకు నెగెటివ్ టాక్ రావడం అభిమానులను షాక్కు గురిచేస్తోంది. అంతేకాదు రెండో రోజు కూడా ఎలోన్ను అంతగా పట్టించుకునే వారు లేకపోవడంతో అభిమానులు తీవ్ర నిరాశలో మునిగిపోయారని ఇండస్ట్రీ సర్కిల్లో జోరుగా టాక్ నడుస్తోంది.
అయితే తమ ఫేవరేట్ హీరో కొత్త సినిమాతో గ్రాండ్ సక్సెస్ అందుకోవడం ఖాయమని ధీమాగా ఉన్నారు అభిమానులు. కోవిడ్ ప్యాండమిక్ సమయంలో ఓ అపార్ట్మెంట్లో చిక్కిపోయిన వ్యక్తి కథ నేపథ్యంలో ఈ సినిమా తెరకెక్కింది. ఎలోన్కు షాజి కైలాస్ దర్శకత్వం వహించగా.. రాజేశ్ జయరామన్ కథనందించారు. ఆశీర్వాద్ సినిమాస్ బ్యానర్లో ఆంటోనీ పెరంబవూర్ ఈ చిత్రాన్ని తెరకెక్కించారు.
మోహన్ లాల్ ప్రస్తుతం రజినీకాంత్ టైటిల్ రోల్ లో నటిస్తోన్న జైలర్లో కీలక పాత్ర పోషిస్తున్నాడు. దీంతోపాటు ఈ స్టార్ హీరో ఖాతాలో ఏకంగా పది సినిమాలున్నాయి. నో డేట్స్ అండ్ కాల్షీట్స్.. ఓన్లీ షూటింగ్స్ అంటూ తగ్గేదేలే అనే డైలాగ్ అప్లై చేస్తూ టాక్ ఆఫ్ ది ఇండస్ట్రీగా నిలుస్తున్నాడు మోహన్ లాల్.