తమిళ, మలయాళ భాషల్లో యువతరంలో మంచి ఫాలోయింగ్ను సంపాదించుకుంది మిర్నా మీనన్. ముఖ్యంగా రజనీకాంత్ ‘జైలర్’ చిత్రంలో ఆమె పాత్రకు మంచి పేరొచ్చింది. ప్రస్తుతం ఈ సొగసరి నాగార్జున ‘నా సామిరంగ’ చిత్రంలో రెండో నాయికగా నటిస్తున్నది. విజయ్ బిన్ని దర్శకత్వం వహించిన ఈ మాస్ యాక్షన్ ఎంటర్టైనర్ సంక్రాంతి కానుకగా ఈ నెల 14న ప్రేక్షకుల ముందుకురానుంది. గురువారం ‘నా సామిరంగ’ చిత్రంలో మంగ పాత్రలో మిర్నా మీనన్ లుక్ను విడుదల చేశారు. ఇందులో ఈ అమ్మడు సంప్రదాయం ఉట్టిపడే చీరకట్టులో అచ్చ తెలుగందంతో మెరిసిపోతున్నది. నచ్చిన చెలికాడి కోసం ఎదురుచూపులు చూస్తున్నట్లుగా ప్రశాంత వదనంతో కనిపిస్తున్నది. గ్రామీణ నేపథ్యంలో హృదయాన్ని కదిలించే ప్రేమకథ, స్నేహం అంశాల కలబోతగా ‘నా సామిరంగ’ చిత్రాన్ని తెరకెక్కిస్తున్నారు. ఈ సినిమాలో మిర్నా మీనన్ పాత్ర కథాగమనంలో కీలకంగా ఉంటుందని దర్శకుడు తెలిపారు. అల్లరి నరేష్, రాజ్తరుణ్, ఆషికా రంగనాథ్ తదితరులు నటిస్తున్న ఈ చిత్రానికి కెమెరా: శివేంద్ర దాశరథి, సంగీతం: ఎం.ఎం.కీరవాణి, నిర్మాత: శ్రీనివాస చిట్టూరి, దర్శకత్వం: విజయ్ బిన్ని.