Visit:
గడిచిన నెలంతా తనకు మిశ్రమానుభూతుల్ని అందించిందంటూ సోషల్ మీడియా వేదికగా గత నెల అనుభవాలను నెమరువేసుకున్నది మలయాళ మందారం మాళవిక మోహనన్. ‘త్యాగరాజన్ కుమారరాజ దర్శకత్వంలో నేను నటిస్తున్న ‘పాకెట్ నవల్’ సినిమా షూటింగ్ గత నెలలోనే మొదలైంది. కోలీవుడ్లోని అత్యుత్తమ దర్శకుల్లో త్యాగరాజన్ ఒకరని నిస్సందేహంగా చెప్పగలను.
ఆయన దర్శకత్వంలో వచ్చిన ‘సూపర్ డీలక్స్’ చిత్రమంటే నాకెంతో ఇష్టం. ఇప్పుడు ఆయనతోనే పనిచేస్తున్నాను. ఆయన మార్గదర్శకత్వంలో నటిగా నన్ను నేను మలచుకోవడం ఓ గొప్ప సృజనాత్మక అనుభవం. అలాగే.. షూటింగ్లో భాగంగా నెల రోజుల పాటు చెన్నైలోనే ఉన్నా. అంతకాలం ఇంటికి దూరంగా ఉండటం భారంగా అనిపించింది.
రోజంతా షూట్లో పాల్గొని, రూమ్కి వెళితే ఒక్కదాన్నే లోన్లీగా ఫీలయ్యేదాన్ని. అప్పడప్పుడు నాకోసం ఇంట్లోవాళ్లు వచ్చేవారు. అప్పుడు మాత్రం రిలీఫ్ అనిపించేది. షూటింగ్ పుణ్యమా అని మహాబలిపురం దేవాలయాలను సందర్శించా. తమిళనాడు ఫుడ్ని ఇష్టంగా ఆరగించా. కొన్ని రోజుల క్రితమే ముంబైలోని మా ఇంటికి చేరా’ అంటూ రాసుకొచ్చింది మాళవిక మోహనన్.
