చేయబోయే సినిమా గురించి ముందుగానే ప్రెస్మీట్ పెట్టి మాట్లాడటం రాజమౌళి స్టయిల్. మహేశ్బాబుతో సినిమా అనుకున్నప్పట్నుంచీ ఈ సినిమా గురించి రకరకాల పుకార్లు షికార్లు చేస్తూనేవున్నాయి. వాటితోపాటు రాజమౌళీ, విజయేంద్రప్రసాద్, కార్తికేయ లాంటి వాళ్లు వేడుకల్లో చిన్న చిన్న లీకులిస్తూ సినిమాపై ఆసక్తిని పెంచుతూనేవున్నారు. అయితే.. అసలైన సమాచారం ఎప్పుడొస్తుంది?. రాజమౌళి ఎప్పుడు ప్రెస్మీట్ పెట్టబోతున్నారు? అనే ప్రశ్నలు మాత్రం ప్రేక్షకుల్లో లేకపోలేదు. నిజానికి ఏప్రిల్ 9న ఉగాది సందర్భంగా ఈ సినిమాకు సంబంధించిన తొలి ప్రెస్మీట్ని రాజమౌళి నిర్వహించనున్నట్టు గతంలో వార్తలొచ్చాయి. అయితే.. సన్నిహిత వర్గాల సమాచారం ప్రకారం ఉగాదికి ప్రెస్మీట్ పెట్టడంలేదట. మహేశ్బాబు పుట్టినరోజైన ఆగస్ట్ 9న ప్రెస్మీట్ నిర్వహించనున్నారట. ఆ రోజునే ఈ సినిమాకు సంబంధించిన పోస్టర్ని కూడా విడుదల చేయనున్నట్టు సన్నిహిత వర్గాల సమాచారం. ట్రెజర్ హంట్ కథాంశంతో రూపొందనున్న ఈ చిత్రానికి సంబంధించిన ప్రీప్రొడక్షన్ వర్క్ ఇప్పటికే మొదలైంది. ఆఫ్రికా అడవుల నేపథ్యంలో పాన్ వరల్డ్ స్థాయి సినిమాగా ఈ చిత్రం రూపొందనుంది. ఈ సినిమాకు సంబంధించిన మిగతా వివరాలు త్వరలో తెలియనున్నాయి.