Visit:
Prabhas | ‘కన్నప్ప’ చిత్రంలో అగ్ర హీరో ప్రభాస్‌ కీలక పాత్రలో నటిస్తున్న విషయం తెలిసిందే. మంచు విష్ణు టైటిల్‌ రోల్‌ని పోషిస్తున్న ఈ సినిమాలో వివిధ భాషలకు చెందిన అగ్ర తారలు భాగమవుతున్నారు. శివపార్వతులుగా అక్షయ్‌కుమార్‌, కాజల్‌ అగర్వాల్‌ కనిపించనున్నారు. ఇటీవల రిలీజ్‌ చేసిన వారిద్దరి పాత్రల తాలూకు ఫస్ట్‌లుక్‌ పోస్టర్స్‌కు మంచి స్పందన లభించింది. దాంతో సినిమాలో ప్రభాస్‌ పాత్ర విశేషాలతో పాటు ఆయన ఫస్ట్‌లుక్‌ ఎలా ఉంటుందోనని అభిమానులు ఆసక్తిగా ఎదురుచూస్తున్నారు.
ఫిబ్రవరి 3న ప్రభాస్‌ ఫస్ట్‌లుక్‌ను రిలీజ్‌ చేయబోతున్నామని మేకర్స్‌ తెలిపారు. ఈ సందర్భంగా సోమవారం ఓ పోస్టర్‌ను విడుదల చేశారు. అయితే ఇందులో ప్రభాస్‌ పాత్ర గురించి ఎలాంటి వివరాలను వెల్లడించలేదు. విశ్వసనీయ సమాచారం ప్రకారం ఈ సినిమాలో ప్రభాస్‌..మానవరూపంలో కనిపించే నందీశ్వరుడి పాత్రను పోషించారని తెలిసింది. ఆయన పాత్ర నిడివి కూడా ఎక్కువగానే ఉంటుందని చెబుతున్నారు. ఈ వార్తలపై స్పష్టత రావాలంటే ఫిబ్రవరి 3 వరకు వేచి చూడాల్సిందే. ముఖేష్‌కుమార్‌ సింగ్‌ దర్శకత్వం వహిస్తున్న ఈ చిత్రాన్ని మంచు మోహన్‌బాబు భారీ వ్యయంతో నిర్మిస్తున్నారు.
