K.G.F Chapter-3 | కన్నడ సినిమాను అంతర్జాతీయ స్థాయికి తీసుకెళ్ళిన చిత్రం ‘కేజీఎఫ్’. అప్పటివరకు కన్నడ సినిమాలను ఇతర ఇండస్ట్రీ వాళ్ళు అంతగా పట్టించుకునే వారు కాదు. అలాంటి సమయంలో కేజీఎఫ్ చిత్రం ప్రభంజనం సృష్టించింది. దీనికి సీక్వెల్గా తెరకెక్కిన కేజీఎఫ్ చాప్టర్ భారీ అంచనాలతో గురువారం విడుదలైంది. ఈ చిత్రం మొదటి షో నుంచే పాజీటీవ్ టాక్ను తెచ్చుకుని చాప్టర్-1కు రెట్టింపు స్థాయిలో ప్రేక్షకులను విపరీతంగా ఆకట్టుకుంటుంది. సౌత్ నుంచి నార్త్ వరకు కలెక్షన్ల ప్రభంజనం సృష్టిస్తుంది. విడుదలైన మొదటి రోజే 130కోట్ల కలెక్షన్లను సాధించి హైయెస్ట్ డే1 రికార్డులలో మూడో స్థానంలో నిలిచింది. అంతేకాకుండా బాలీవుడ్లో వాళ్ళ సినిమాలను సైతం వెనక్కి నెట్టి టాప్ ప్లేస్లో నిలిచింది. యష్ నటన, అభినయానికి ప్రేక్షకులు బ్రహ్మరథం పడుతున్నారు. ప్రశాంత్ నీల్ టేకింగ్కు సినీప్రముఖులు సైతం జైజైలు కొడుతున్నారు.
ఇదిలా ఉంటే చాప్టర్-2 చిత్రం ఎండింగ్లో చాప్టర్-3 ఉంటుందని మేకర్స్ హింట్ ఇచ్చారు. ఈ క్రమంలోనే కేజీఎఫ్ ఎక్సిక్యూటీవ్ ప్రొడ్యూసర్ కార్తిక్ గౌడ చాప్టర్-3 ప్రీ ప్రొడక్షన్ పనులు ఇప్పటికే ప్రారంభమైయ్యాయని వెల్లడించాడు. దీనిపై కేజీఎఫ్ అభిమానులు సంతోషం వ్యక్తం చేస్తున్నారు. ఈ చిత్రంలో యష్కు జోడీగా శ్రీనిధి శెట్టి హీరోయిన్గా నటించింది. బాలీవుడ్ స్టార్ సంజయ్దత్, రవీనా టాండన్ కీలకపాత్రల్లో నటించారు. హోంబలే ఫిలింస్ బ్యానర్పై విజయ్ కిరగందూర్ ఈ చిత్రాన్ని నిర్మించాడు.