Visit:
‘జగదేకవీరుడు అతిలోక సుందరి’ చిత్రం ఇటీవలే రీరిలీజ్‌ అయిన విషయం తెలిసిందే. ఈ సందర్భంగా తన తల్లి, దివంగత శ్రీదేవిని గుర్తుచేసుకుంటూ ఆమెకు నివాళిగా జాన్వీకపూర్‌ ఇన్‌స్టాగ్రామ్‌లో ఓ పోస్ట్‌ పెట్టింది. ‘జగదేకవీరుడు అతిలోక సుందరి’ పోస్టర్స్‌ ముద్రించిన డెనిమ్‌ జాకెట్‌ను ధరించి..ఆ ఫొటోలను ఇన్‌స్టాలో షేర్‌ చేసింది. ‘కొద్దిరోజుల క్రితమే రీరిలీజ్‌ వెర్షన్‌ను చూశాను.
అద్భుతంగా అనిపించింది. అమ్మను చూస్తుంటే నిజంగా దేవకన్యలా అనిపించింది. తన ముద్దుముద్దు మాటలు, చేష్టలు అబ్బురపరిచాయి. చిరంజీవిగారి కామెడీ హైలైట్‌. ఇంత గొప్ప చిత్రాన్ని అందించిన దర్శకులు రాఘవేంద్రరావుగారి విజన్‌కు హ్యాట్సాఫ్‌’ అని రాసుకొచ్చింది. ఈ పోస్ట్‌ సోషల్‌మీడియాలో వైరల్‌గా మారింది. ప్రస్తుతం జాన్వీకపూర్‌ తెలుగులో ‘పెద్ది’ చిత్రంలో నటిస్తున్నది.
