ఈ సినిమా వల్ల ప్రపంచానికి తెలిశాను

ఏపీకి చెందిన ప్రముఖ జానపద గాయని గరివిడి లక్ష్మి జీవితం ఆధారంగా తెరకెక్కిన సినిమా ‘గరివిడి లక్ష్మి’. ఆనంది టైటిల్‌ రోల్‌ పోషించిన ఈ సినిమాకు గౌరినాయుడు జమ్ము దర్శకుడు.

ఏపీకి చెందిన ప్రముఖ జానపద గాయని గరివిడి లక్ష్మి జీవితం ఆధారంగా తెరకెక్కిన సినిమా ‘గరివిడి లక్ష్మి’. ఆనంది టైటిల్‌ రోల్‌ పోషించిన ఈ సినిమాకు గౌరినాయుడు జమ్ము దర్శకుడు. టీజీ విశ్వప్రసాద్‌, కృతి ప్రసాద్‌ నిర్మాతలు. ఇటీవలే విడుదలైన ఈసినిమా థియేటర్లలో ప్రదర్శితమవుతున్నది. ఈ సందర్భంగా హైదరాబాద్‌లో సక్సెస్‌మీట్‌ నిర్వహించారు. ఈ కార్యక్రమానికి అతిథిగా విచ్చేసిన గాయని గరివిడి లక్ష్మి మాట్లాడుతూ ‘బుర్రకథ వల్ల తెలుగు రాష్ర్టాల్లో నాకు పేరుంది.

కానీ ఈ సినిమా వల్ల నేను ప్రపంచానికి తెలిశాను. ఈ దర్శక,నిర్మాతలకు నా కథను సినిమాగా తీయాలని ఎందుకు అనిపించిందో తెలియదు. నా జీవితాన్ని తెరపై చూస్తుంటే చెప్పలేనంత ఆనందంగా అనిపించింది’ అని సంతోషం వెలిబుచ్చారు. ఈ సినిమా తన జీవితానికే ప్రత్యేకమైనదని నటి ఆనంది తెలిపారు. ఇంకా నిర్మాతలు టీజీ విశ్వప్రసాద్‌, కృతి ప్రసాద్‌, దర్శకుడు గౌరీ నాయుడు, నటులు రాగ్‌ మయూర్‌, అంకిత్‌ కొయ్య, సంగీత దర్శకుడు చరణ్‌ అర్జున్‌ కూడా మాట్లాడారు.