Chiyaan Vikram | ‘మహాన్‌’ సీక్వెల్‌ రానుందా?.. చియాన్‌ విక్రమ్‌ పోస్టుపై సినీవర్గాల్లో చర్చ

ప్రయోగాత్మక పాత్రల్లో నటించేందుకు ఆసక్తిని కనబరిచే అతి కొద్దిమంది దక్షిణాది నటుల్లో చియాన్‌ విక్రమ్‌ ఒకరు. సేతు, శివపుత్రుడు, అపరిచితుడు, నాన్న, ఐ.. ఇలా ఎన్నో అద్భుతమైన పాత్రల్లో అలరించాయన.

Chiyaan Vikram | ప్రయోగాత్మక పాత్రల్లో నటించేందుకు ఆసక్తిని కనబరిచే అతి కొద్దిమంది దక్షిణాది నటుల్లో చియాన్‌ విక్రమ్‌ ఒకరు. సేతు, శివపుత్రుడు, అపరిచితుడు, నాన్న, ఐ.. ఇలా ఎన్నో అద్భుతమైన పాత్రల్లో అలరించాయన. విక్రమ్‌ నటించిన ‘తంగలాన్‌’ చిత్రం ఏప్రిల్‌లో విడుదల కానుంది. పారంజిత్‌ దర్శకుడు. ఇదిలావుంటే.. రీసెంట్‌గా సోషల్‌మీడియాలో విక్రమ్‌ పెట్టిన ఓ పోస్ట్‌ ప్రస్తుతం చర్చనీయాంశంగా మారింది. ఆయన నటించిన ‘మహాన్‌’ సినిమా రెండేళ్లు పూర్తి చేసుకున్న సందర్భంగా రెండు స్టిల్స్‌ షేర్‌ చేస్తూ ‘మహాన్‌2’ అని క్యాప్షన్‌ పెట్టారాయన.

దాంతో.. విక్రమ్‌ సరదాగా పెట్టారా? లేక సీరియస్‌గానే ‘మహాన్‌’ సీక్వెల్‌ రానుందా? అనేది ఇప్పుడు సినీవర్గాల్లో పెద్ద చర్చగా మారింది. అభిమానుల నుండి కూడా ఊహించని స్పందన రావడం విశేషం. ‘ఈ సారైనా థియేటర్లలో విడుదల చేయండి’ అంటూ ఓ అభిమాని, ‘మేం వెయిటింగ్‌’ అంటూ మరో అభిమాని ఇలా లెక్కకు మించిన కామెంట్లు. నిజానికి రెండేళ్ల క్రితం విడుదలైన ‘మహాన్‌’ చిత్రం నేరుగా ఓటీటీలో విడుదలై అఖండ విజయాన్ని అందుకుంది. చాలాకాలం తర్వాత విక్రమ్‌కి పెద్ద హిట్‌గా నిలిచిందా సినిమా. పైగా అందులో విక్రమ్‌ తనయుడు ధృవ్‌ కూడా కీలక పాత్ర పోషించడం విశేషం. ఇంతకీ ‘మహాన్‌2’లో నిజమెంత? అనేది త్వరలో తెలుస్తుంది.