‘నటుడిగా ప్రేక్షకుల ఊహలకు భిన్నమైన కథాంశాలతో సినిమాలు చేస్తూ వారిని సర్ప్రైజ్ చేసేందుకు ప్రయత్నిస్తుంటా’ అని అన్నారు సత్యదేవ్. ఆయన హీరోగా నటించిన చిత్రం ‘స్కైలాబ్’. విశ్వక్ ఖండేరావు దర్శకుడు. పృథ్వీ పిన్నమరాజు నిర్మాత. డిసెంబర్ 4న విడుదలకానుంది. ఈ సందర్భంగా సత్యదేవ్ పాత్రికేయులతో ముచ్చటించిన విశేషాలు..
1979 బ్యాక్డ్రాప్లో స్కైలాబ్ పడిపోతున్నట్లుగా వచ్చిన పుకార్ల నేపథ్యంలో సాగే కామెడీ సినిమా ఇది. జనాల భయాల్ని ఉపయోగించుకుంటూ డబ్బులు సంపాదించుకోవాలని భావించే ఆనంద్ అనే డాక్టర్గా నేను ఈ సినిమాలో కనిపిస్తా. గౌరి, సుబేదార్ రామారావుతో అతడికి ఉన్న సంబంధమేమిటన్నది ఆసక్తిని రేకెత్తిస్తుంది. నా సినీ ప్రయాణంలో బాక్సాఫీస్ హిట్ అనే మాట ఇప్పటికీ వినలేదు. ఆ లోటు ఈ సినిమాతో తీరుతుందని అనుకుంటున్నా. కరీంనగర్లోని బండలింగపల్లి అనే ఫిక్షన్ విలేజ్ నేపథ్యంలో ఈ కథ సాగుతుంది. 1979 కాలం నాటి తెలంగాణ యాసను ఉపయోగిస్తూ సింక్సౌండ్లో సినిమా చేశాం. ఈ విధానం వల్ల సన్నివేశాలు, సంభాషణలు మరింత రియలిస్టిక్గా వచ్చాయి. కథ, పాత్రల పరంగా సవాళ్ల కోసం ఎప్పుడూ ఎదురుచూస్తుంటా. ఇప్పటివరకు వెండితెరపై ఎవరూ చేయని వైవిధ్యమైన ప్రయత్నమిది. ఆ కొత్తదనం నచ్చే అంగీకరించా. ప్రస్తుతం హీరోగా ‘గుర్తుందా శీతాకాలం’, ‘గాడ్సే’సినిమాలు చేస్తున్నా. చిరంజీవి ‘గాడ్ఫాదర్’తో పాటుగా హిందీలో అక్షయ్కుమార్ కీలక పాత్రలు చేస్తున్నా’ అని తెలిపారు.