ముంబై : సీనియర్ నటుడు ధర్మేంద్ర ఆరోగ్య పరిస్ధితి బాగా లేదని, ఆయన ఆస్పత్రిలో చికిత్స పొందుతున్నారని వచ్చిన వార్తలను ధర్మేంద్ర కుమారుడు బాబీ డియోల్ తోసిపుచ్చారు. తన తండ్రి క్షేమంగా ఉన్నారని, ఇంటి వద్ద ఉంటూ ఆయన వేగంగా కోలుకుంటున్నారని చెప్పారు.
తన తండ్రి ఆరోగ్యంపై అభిమానులు, ఆత్మీయులు చూపుతున్న శ్రద్ధకు ధన్యవాదాలు తెలిపారు. బాబీ డియోల్ ప్రకటనతో అభిమానులు ఊరట పొందారు. కాగా ధర్మేంద్ర ఆరోగ్య పరిస్ధితి విషమంగా ఉందని, ముంబైలోని బ్రీచ్క్యాండీ ఆస్పత్రిలో ఆయన చికిత్స పొందుతున్నారని పలు వార్తా సంస్ధల్లో కధనాలు రావడంతో సీనియర్ నటుడి అభిమానులు ఆందోళనకు గురయ్యారు.
ఇక బాబీడియోల్ నటించిన ఆశ్రమ్ 3 వెబ్సిరీస్ ఇటీవల విడుదల కాగా, తండ్రి ధర్మేంద్ర, సోదరుడు సన్నీ డియోల్తో కలిసి అప్నే 2లో నటిస్తున్నారు. రణ్బీర్ కపూర్, రష్మికతో కలిసి యానిమల్లో బాబీ డియోల్ కనిపించనున్నారు. మరోవైపు ధర్మేంద్ర త్వరలో రాకీ అవుర్ రాణి కి ప్రేమ కహానీలో సందడి చేయనున్నారు. ఈ మూవీలో రణ్వీర్ సింగ్, అలియా భట్, షబనా అజ్మీ, జయా బచ్చన్లతో కలిసి ధర్మేంద్ర స్క్రీన్ షేర్ చేసుకుంటారు.