TDS on Crypto Assets | క్రిప్టో కరెన్సీలు.. వర్చువల్ డిజిటల్ అసెట్స్ (వీడీఏ)పై టీడీఎస్ మినహాయింపులు అమలు చేసేందుకు ఆదాయం పన్ను (ఐటీ) శాఖ రంగం సిద్ధం చేసింది. దీని ప్రకారం క్రిప్టో కరెన్సీ ఎక్స్చేంజ్లు.. తమ ఖాతాదారులకు వర్చువల్ డిజిటల్ అసెట్స్ ట్రాన్స్ఫర్, పేమెంట్ పాలసీ తదితర వివరాలు వెల్లడించాల్సి ఉంటుంది. ఒక ఆర్థిక సంవత్సరంలో రూ.10 వేలకు పైగా క్రిప్టో కరెన్సీ చెల్లింపులపై ఒకశాతం టీడీఎస్ మినహాయిస్తారు. వచ్చే నెల ఒకటో తేదీ నుంచి ఈ నిర్ణయం అమల్లోకి వస్తుందని ఆదాయం పన్నుశాఖ తెలిపింది. ఇందుకోసం ఐటీ రూల్స్లో కేంద్ర ప్రత్యక్ష పన్నుల బోర్డు (సీబీడీటీ) సవరణలు తీసుకొచ్చింది. ఈ నెల 22న సర్క్యులర్ జారీ చేసింది.
సవరించిన ఐటీ రూల్స్ ప్రకారం క్రిప్టో ఇన్వెస్టర్లు తమ లావాదేవీలకు సంబంధించి ఫామ్- 26క్యూఇ, ఫామ్- 16ఇ కింద టీడీఎస్ రిటర్న్ దాఖలు చేయాలి. ఆదాయం పన్నుచట్టంలోని 194 ఎస్ సెక్షన్ కింద మినహాయించిన టీడీఎస్ను అదే నెలాఖరు నుంచి 30 రోజుల్లో ప్రభుత్వ ఖజానాలో జమ చేయాలి. ఈ సొమ్ము డిపాజిట్ కోసం 26క్యుఇ ఫామ్ కింద చలాన్ కం స్టేట్మెంట్ వాడాలి. దీనిపై తలెత్తే సందేహాలను నివృత్తి చేస్తూ ఆదాయం పన్ను శాఖ.. ఎఫ్ఏక్యూ కూడా జారీ చేసింది.
ఈ ఫామ్ల్లో ఇచ్చిన సమాచారం ప్రకారం క్రిప్టో కరెన్సీ అసెట్స్ నికర లావాదేవీల విలువపై టీడీఎస్ విధిస్తారు. వివిధ క్రిప్టో కరెన్సీ లావాదేవీలకు సంబంధించిన పన్నును వాటి ఎక్స్చేంజ్లే వసూలు చేయాల్సి ఉంటుంది. క్రిప్టో కరెన్సీ అసెట్స్ విక్రయదారులు, కొనుగోలుదారులు ప్రత్యక్షంగా జరిపే లావాదేవీలు, క్రిప్టోల కొనుగోలుదారులు జరిపే పేమెంట్స్ అన్నీ టీడీఎస్ పరిధిలోకే వస్తాయి.