రూ.37 ల‌క్ష‌ల బైక్‌.. 24 గంట‌ల్లోనే బుకింగ్స్ క్లోజ్‌

ముంబై: ఆ బైకు ధ‌ర రూ.37,20,342. కానీ ఫ‌స్ట్ లాట్ కోసం బుకింగ్స్ ప్రారంభించిన 24 గంట‌ల్లోనే పూర్త‌యిపోవ‌డం విశేషం. హోండా మోటార్‌సైకిల్ & స్కూటర్ ఇండియా (హెచ్ఎంఎస్ఐ) ఈ మ‌ధ్యే ప్ర‌క‌టించిన గోల్డ్ వింగ్ టూర్ బైక్‌కు ఇండియాలో ఫుల్ డిమాండ్ ఏర్ప‌డింది. ఈ బైకు ప్రారంభ ధ‌ర‌ను రూ.37.20 ల‌క్ష‌లుగా నిర్ణ‌యించినా.. ఎగ‌బ‌డి కొన్నారు. గ‌త జూన్‌లోనే ఈ సూప‌ర్‌బైక్ గోల్డ్ వింగ్ టూర్ అప్‌డేటెడ్ వెర్ష‌న్‌ను హోండా మోటార్‌సైకిల్ ఇండియాలో లాంచ్ చేసింది. ఇది పూర్తిగా జ‌పాన్‌లోనే త‌యారై ఇండియాకు రానుంది.

1833 సీసీ గోల్డ్ వింగ్ టూర్ బైక్ రెండు వేరియంట్ల‌లో వ‌స్తోంది. ఎయిర్‌బ్యాగ్‌తో కూడిన‌ డ్యుయ‌ల్ క్ల‌చ్ ట్రాన్స్‌మిష‌న్ (డీసీటీ) ఒక‌టి కాగా.. మాన్యువ‌ల్ ట్రాన్స్‌మిష‌న్ మ‌ర‌కొటి. సెవ‌న్ స్పీడ్ డ్యుయ‌ల్ క్ల‌చ్ ట్రాన్స్‌మిష‌న్ మోడ‌ల్ ధ‌ర‌ను రూ.39,16,055గా నిర్ణ‌యించ‌గా.. మ‌రో వేరియంట్‌కు రూ.37,20,342 (ఎక్స్-షోరూమ్‌, గుర్గావ్‌)గా నిర్ణ‌యించారు. ఆపిల్ కార్‌ప్లే, ఆండ్రాయిడ్ ఆటోను ఈ బైక్ సపోర్ట్ చేస్తుంది. బ్లూటూత్ క‌నెక్టివిటీ కూడా ఉంది.