Gold Price | ఒకేరోజు రూ.1400 త‌గ్గిన బంగారం ధ‌ర‌.. 1.86 ల‌క్ష‌ల‌కు దిగొచ్చిన వెండి..!

Gold Price | దేశీయ మార్కెట్లో బంగారం (Gold), వెండి (Silver) ధరలు దిగి వ‌స్తున్నాయి. అమెరికా ద్రవ్యోల్బణ (Inflation) గణాంకాలు, వడ్డీరేట్ల పెంపు అంచనాల కార‌ణంగా అంతర్జాతీయ విపణిలో బంగారం, వెండి లోహాల నుంచి పెట్టుబడులు వెనక్కి మళ్లుతున్నాయి. ఆ ప్రభావంతో దేశీయ మార్కెట్‌లో వెండి, బంగారం ధరలు తగ్గుముఖం పట్టాయి.

Gold Price : దేశీయ మార్కెట్లో బంగారం (Gold), వెండి (Silver) ధరలు దిగి వ‌స్తున్నాయి. అమెరికా ద్రవ్యోల్బణ (Inflation) గణాంకాలు, వడ్డీరేట్ల పెంపు అంచనాల కార‌ణంగా అంతర్జాతీయ విపణిలో బంగారం, వెండి లోహాల నుంచి పెట్టుబడులు వెనక్కి మళ్లుతున్నాయి. ఆ ప్రభావంతో దేశీయ మార్కెట్‌లో వెండి, బంగారం ధరలు తగ్గుముఖం పట్టాయి. ఇవాళ (గురువారం) ఉదయం 10 గంటల సమయంలో హైదరాబాద్‌ విపణిలో 24 క్యారెట్ల మేలిమి 10 గ్రాముల బంగారం ధర (Gold Rate) రూ.1,42,350కు చేరింది.

క్రితం రోజుతో పోలిస్తే బంగారం ధర ఏకంగా రూ.1400 తగ్గింది. ఇక కిలో వెండి ధర రూ.1,86,550 పలికింది. బుధవారంతో పోలిస్తే వెండి ధర దాదాపు రూ.3 వేలకుపైనే తగ్గడం గమనార్హం. అంతర్జాతీయ విపణిలో స్పాట్‌ గోల్డ్‌ ఔన్సు ధర 3,974 డాలర్‌లు, ఔన్సు వెండి ధర 51.48 డాలర్లు పలుకుతున్నాయి. బంగారం ధర ఈ స్థాయిలో దిగిరావడం నవంబర్‌ 4 తర్వాత మళ్లీ ఇదే తొలిసారి. ఇక మల్టీ కమొడిటీ ఎక్స్ఛేంజీలో డిసెంబర్‌ డెలివరీకి బంగారం 10 గ్రాముల ధర రూ.1.38 లక్షలకు తగ్గింది. కేజీ వెండి ధర రూ.1.82 లక్షలకు దిగి వ‌చ్చింది.

అంతర్జాతీయ మార్కెట్‌లో డాలర్ వాల్యూ 19 నెలల గరిష్ఠానికి చేరింది. అంతర్జాతీయంగా బంగారం-వెండి లావాదేవీలు డాలర్లలోనే జరుగుతాయి. డాలర్‌ విలువ పెరిగినప్పుడు ఇతర దేశాల కరెన్సీల్లో బంగారం, వెండి కొనుగోలు ఖరీదైనదిగా మారుతుంది. దాంతో అంతర్జాతీయంగా డిమాండ్‌ తగ్గి, స్పాట్‌ మార్కెట్‌తోపాటు ఫ్యూచర్స్‌ మార్కెట్‌లోనూ లోహాల ధరలపై ప్రతికూల ప్రభావం పడుతుంది. ఇక వచ్చే నెలలో ఫెడ్‌ వడ్డీ రేట్లను పెంచవ‌చ్చన్న అంచనాలు కూడా బంగారం, వెండి ధరలపై ఒత్తిడిని పెంచుతున్నాయి.