Raptadu case | రాప్తాడు నిందితుడిపై కాల్పుల ఘటన.. ఏపీ హైకోర్టులో పిటిషన్

Raptadu case | అనంతపురం జిల్లా రాప్తాడు నిందితుడు హేమంత్‌ పై పోలీసులు జరిపిన కాల్పులపై ఏపీ హైకోర్టులో ఓ న్యాయవాది పిటిషన్‌ దాఖలు చేశారు.

అమరావతి : అనంతపురం జిల్లా రాప్తాడు ( Raptadu ) నిందితుడు హేమంత్‌ ( Hemanth ) పై పోలీసులు జరిపిన కాల్పులపై ఏపీ హైకోర్టులో ఓ న్యాయవాది పిటిషన్‌ దాఖలు చేశారు. అతడిని ఆసుపత్రిలోకి ఈడ్చుకెళ్లిన వ్యవహారంపై స్వతంత్ర విచారణ జరిపించాలని కోరారు. నిందితుడుపై ఆరు రౌండ్ల కాల్పులు జరపాల్సిన అవసరం ఏమిటి ? కాల్పుల సమయంలో నెలకొన్న పరిస్థితులు ఏమిటో తెలియజేయాలని పిటిషన్‌లో పేర్కొన్నారు.

నిందితుడి కాళ్లకు బుల్లెట్‌ గాయాలతో పాటు ముఖంపై కూడా గాయాలు అయ్యాయని తెలిసింది. అవి ఎలా ఏర్పడ్డాయి, వాటికి కాల్పులతో సంబంధం ఉందా? అటవీ ప్రాంతంలో పడిపోవడం వల్లే గాయాలయ్యాయన్న పోలీసుల వివరణలో వాస్తవమెంత అనే అంశాలను వైద్య, ఫోరెన్సిక్‌ ఆధారాలతో నిర్ధారించాలని కోరారు. గాయపడిన వ్యక్తిని తగిన జాగ్రత్తలు తీసుకోకుండా ఆసుపత్రిలోకి ఈడ్చుకెళ్లడం వల్ల అతడి గాయాలు మరింత తీవ్రం అయ్యే ప్రమాదం ఉందని, వీటిపై విచారణ జరపాలని పిటిషనర్ ప్రజాప్రయోజన వ్యాజ్యాన్ని దాఖలు చేశారు.

అనంతపురం జిల్లా రాప్తాడు ఉన్నత పాఠశాలలో పదోతరగతి చదువుతున్న బాలికపై శనివారం ఎలక్ట్రిక్‌ రంపంతో విచక్షణారహితంగా దాడి చేసి తీవ్రంగా గాయపరిచాడు. అడ్డువచ్చిన మరో విద్యార్థినిపై దాడికి పాల్పడిన విషయం తెలిసిందే. తీవ్రంగా గాయపడిన బాధిత బాలిక ప్రస్తుతం బెంగళూరులోని మణిపాల్‌ హాస్పిటల్‌లో చికిత్స పొందుతున్నది.