క్యాన్సర్ ఉందంటే, ఇక రోజులు లెక్కబెట్టాల్సిందే అనుకునేవారు. కానీ ఇప్పుడు, వైద్యరంగంలో సాంకేతికత అభివృద్ధి చెందుతున్నది. వ్యాధిని తొలిదశలోనే గుర్తించి, రోగి జీవితకాలాన్ని పెంచుతున్నారు డాక్టర్లు. కొన్ని కేసుల్లో క్యాన్సర్ కణితులను తొలగించి, పూర్తి ఆరోగ్యవంతులను చేస్తున్నారు. వైద్యంతోపాటు, మనం తీసుకునే ఆహారం కూడా క్యాన్సర్ కణాలను తగ్గిస్తుంది.
పండ్లు – కూరగాయలు
అన్నిరకాల పండ్లు, కూరగాయలు తినాలి. వాటిలోని ఫైటోకెమికల్స్, యాంటీ ఆక్సిడెంట్స్ క్యాన్సర్తో పోరాడుతాయి. వీటిలోని విటమిన్స్, మినరల్స్ క్యాన్సర్ నివారణలో తోడ్పడతాయి. ముఖ్యంగా సల్ఫోరఫేన్ ఎక్కువగా ఉండే క్యాలీఫ్లవర్, క్యాబేజి, బ్రకోలి తరచూ తీసుకోవాలి. ఇవి క్యాన్సర్ కణితుల పరిమాణాన్ని తగ్గించి, కణాల వృద్ధిని తగ్గిస్తాయి. పండ్లలో సిట్రస్ జాతికి చెందినవి బాగా తినాలి.
మసాలా దినుసులు
భారతీయ వంటగదిలో తప్పనిసరిగా ఉండే దినుసులు దాల్చిన చెక్క, జీలకర్ర. వీటిలో యాంటీ క్యాన్సర్ గుణాలు అపారం. అలాగే పసుపులోని కర్క్యుమిన్ కాంపౌండ్ క్యాన్సర్తో పోరాడుతుంది.
టమాట
ఎర్రటి టమాటాల్లో లైకోపీన్ అనే యాంటీ ఆక్సిడెంట్ ఉంటుంది. ఇది ఊపిరితిత్తుల క్యాన్సర్ నుంచి కాపాడుతుంది. అయితే, టమాటాను ఉడికించుకుని తింటేనే మంచి ఫలితాలు ఉంటాయి. వాటిని వండినప్పుడే లైకోపీన్ విడుదల అవుతుంది.
వెల్లుల్లి
ఇందులోని అల్లీసిన్ అనే కాంపౌండ్ క్యాన్సర్ను ఎదుర్కొంటుంది. అల్లీసిన్ కాంపౌండ్ కాలేయం, రొమ్ము వంటి అవయవాలపై దాడి చేసే నిట్రోసమైన్ను అడ్డుకుంటుందని పరిశోధకులు చెబుతున్నారు. వెల్లుల్లి విడుదల చేసే సల్ఫర్ పదార్థాలు క్యాన్సర్ కణాలను నివారిస్తాయి.
మయూరి ఆవుల
న్యూట్రిషనిస్ట్,
Mayuri@trudiet.in