చెక్కులు చెల్లడం లేదన్న వార్తలపై స్పందించిన సీఎస్‌

CS Somesh Kumar |

హైదరాబాద్‌ : వ్యవసాయ చట్టాలకు వ్యతిరేకంగా పోరాటంలో అసువులు బాసిన పంజాబ్‌, హర్యానకు చెందిన 709 మంది రైతులకు సీఎం కేసీఆర్‌ చెక్కులు పంపిణీ చేశారని ప్రభుత్వ ప్రధాన కార్యదర్శి సోమేశ్‌కుమార్‌ తెలిపారు. 22 మే, 2022 రోజున 1,010 చెక్కులను పంపిణీ చేసినట్లు పేర్కొన్నారు. అయితే, చెక్కులు నగదు రూపంలోకి మారడం లేదని కొన్ని మీడియా సంస్థలు వాస్తవాలను తెలుసోకుండా తప్పుడు ప్రచారం చేస్తున్నాయన్నారు. ఈ విషయంపై తెలంగాణ ప్రభుత్వం తక్షణం స్పందించి విచారణ చేసిందని, మొత్తం 1010 చెక్కుల్లో 814 చెక్కులకు నగదు చెల్లింపు ఇప్పటికే జరిగాయన్నారు. కాగా, బ్యాంకు నిబంధనల మేరకు నిర్దేశిత మూడు నెలల సమయంలోపల ఆయా చెక్కులను బ్యాంకుల్లో డిపాజిట్‌ చేయాల్సి ఉంటుందని, అలా చేయకపోవడం వల్ల మిగతా కొన్ని చెక్కులను నగదు చెల్లింపులు నిలిపివేసినట్లు నిర్ధారణ అయ్యిందన్నారు.

అయితే, చెక్కులు నిర్ణీత సమయంలో డిపాజిట్‌ చేయకపోవడం వల్ల జరిగిన సాంకేతిక పొరపాటే తప్ప మరొకటి కాదన్నారు. ఈ విషయంపై తెలంగాణ ప్రభుత్వం వెంటనే స్పందించిందని, సంబంధిత బ్యాంకులకు గడువు దాటిన తర్వాత డిపాజిట్‌ చేశారని చెబుతున్న మిగితా చెక్కులకు మరికొంత సమయం ఇచ్చి.. నగదు చెల్లింపులు జరిగేలా అనుమతి ఇవ్వాలని (రీవాలిడేట్‌ చేయాలని) ప్రభుత్వం ఆయా బ్యాంకులకు ఆదేశాలు జారీ చేసిందన్నారు. ఇంకా ఈ విషయానికి సంబంధించి మరింత సహాయం కోసం ప్రభుత్వ జాయింట్ సెక్రటరీ (రెవెన్యూ డిపార్ట్ మెంట్) రాంసింగ్‌ 9581992577 నంబరులో సంప్రదింవచ్చన్నారు. అమరులైన రైతుల కుటుంబాలకు తెలంగాణ ప్రభుత్వం అండగా నిలుస్తుందని మరోసారి రాష్ట్ర ప్రభుత్వం స్పష్టం చేస్తుందని, వారికి ప్రభుత్వం అందించిన ఆర్థిక సహాయం అందే వరకు సహకారం అందిస్తుందని సీఎస్‌ స్పష్టం చేశారు.