అగ్రి వీసీ వేధింపులపై ఆగ్రహం

జయశంకర్‌ తెలంగాణ వ్యవసాయ విశ్వవిద్యాలయం (పీజేటీఎస్‌ఏయూ) వైస్‌ చాన్సలర్‌ అల్దాస్‌ జానయ్యపై అదే వర్సిటీకి చెందిన ఒక మహిళా అసిస్టెంట్‌ ప్రొఫెసర్‌ చేసిన తీవ్రస్థాయి లైంగిక వేధింపుల ఆరోపణలు రాష్ట్రంలో పెనుదుమారం రేపుతున్నాయి.

• రోడ్డెక్కిన విద్యార్థులు, ప్రొఫెసర్లు
• ముఖ్యమంత్రి అండతోనే కేసును నీరుగారుస్తున్నారని ఆరోపణ
• లైంగిక వేధింపులను మీడియాకు వెల్లడించిన ప్రొఫెసర్‌ తేజశ్రీ
• జానయ్యపై చర్యలు తీసుకోవాలని ఆందోళనలు
• తననూ వేధించాడని మరో మహిళా ప్రొఫెసర్‌ కంటతడి
• 12న విచారణకు రావాలని వీసీకి మహిళా కమిషన్‌ ఆదేశం

హైదరాబాద్‌, నవంబర్‌ 9 (నమస్తే తెలంగాణ): జయశంకర్‌ తెలంగాణ వ్యవసాయ విశ్వవిద్యాలయం (పీజేటీఎస్‌ఏయూ) వైస్‌ చాన్సలర్‌ అల్దాస్‌ జానయ్యపై అదే వర్సిటీకి చెందిన ఒక మహిళా అసిస్టెంట్‌ ప్రొఫెసర్‌ చేసిన తీవ్రస్థాయి లైంగిక వేధింపుల ఆరోపణలు రాష్ట్రంలో పెనుదుమారం రేపుతున్నాయి. బాధ్యతాయుతమైన పదవిలో ఉన్న వీసీ తీరుపై రాష్ట్ర మహిళా కమిషన్‌ తీవ్రంగా స్పందించింది. ఈ అకృత్యాలపై పూర్తిస్థాయి విచారణ చేపట్టేందుకు వీసీ జానయ్యకు కమిషన్‌ సోమవారం నోటీసులు జారీ చేసింది. ఈ నెల 12న స్వయంగా విచారణకు హాజరుకావాలని పేర్కొన్నది.

పదిరోజుల క్రితమే ఫిర్యాదు చేసినా వీసీ జానయ్యపై ఎలాంటి చర్యలు తీసుకోకపోవడంతో బాధితురాలు తేజశ్రీ మూడు రోజుల్లో రెండుసార్లు మీడియా ముందుకు వచ్చి కన్నీటి పర్యంతమయ్యారు. నిందితుడికి ఉన్న రాజకీయ పలుకుబడి, ఉన్నతస్థాయి అండదండల వల్లే కేసును తొకిపెట్టే ప్రయత్నాలు జరుగుతున్నాయని ఆరోపణలు వెల్లువెత్తుతున్నాయి. మహిళలకు ఇంత అన్యాయం జరుగుతుంటే ముఖ్యమంత్రి రేవంత్‌రెడ్డి ఏం చేస్తున్నారని, సీఎం అండతోనే కేసును నీరుగార్చే ప్రయత్నం చేస్తున్నారంటూ ఆరోపిస్తున్నారు.

వీసీ బాధితుల జాబితాలో మరికొందరు మహిళలు ఉన్నట్టు చెప్తున్నారు. ఒక పక్క నిరసనలు జరుగుతుండగానే వీసీ జానయ్య తనతోనూ అనుచితంగా ప్రవర్తించినట్టు మరో మహిళా ప్రొఫెసర్‌ కంటతడి పెట్టారు. తన సహచర మహిళా ప్రొఫెసర్‌తో పాటు మరొక మహిళను ఉద్దేశించి ‘మీరిద్దరూ మొగుడు పెళ్లాంలా వర్సిటీలో తిరుగుతున్నారు’ అంటూ అసభ్యకర వ్యాఖ్యలతో తీవ్రంగా వేధించారని మరో మహిళా ప్రొఫెసర్‌ ఆవేదన వ్యక్తంచేశారు.

వీసీ జానయ్యను తొలగించేవరకు పోరాటం

వ్యవసాయ యూనివర్సిటీ, నవంబర్‌ 09: వీసీ జానయ్య తీరుపై సీఎం, ఉన్నతాధికారులు వెంటనే స్పందించి చర్యలు చేపట్టాలని ప్రొఫెసర్‌ జయశంకర్‌ తెలంగాణ వ్యవసాయ విశ్వవిద్యాలయం అధ్యాపకులు, విద్యార్థి సంఘాల నాయకులు డిమాండ్‌ చేశారు. వీసీని వెంటనే బర్తరఫ్‌ చేసి బాధితురాలికి న్యాయం చేయాలంటూ తెలంగాణ సైంటిస్ట్‌ అసోసియేషన్‌ (టాసా) , విశ్వవిద్యాలయం టీచింగ్‌, నాన్‌ టీచింగ్‌, విద్యార్థి సంఘాల ఆధ్వర్యంలో సోమవారం రాజేంద్రనగర్‌ కాలేజీ ఎదుట నిరసన తెలిపారు.

‘అగ్రి వర్సిటీలోనే చదివాను, ఇక్కడే 2014 నుంచి అసిస్టెంట్‌ ప్రొఫెసర్‌గా ఉద్యోగం చేస్తున్నా. జానయ్యను తండ్రిలా భావించా. తన బుద్ధిని తెలుసుకోలేకపోయా. ఎనిమిది నెలలుగా మానసికంగా కుంగి, కృశించి ఇక తప్పని పరిస్థితుల్లో ఉమెన్‌వింగ్‌, డీజీపీ, గవర్నర్‌కు ఫిర్యాదు చేశా’నని బాధితురాలు తేజశ్రీ పేర్కొన్నారు. ఫిర్యాదును వెనక్కు తీసుకోవాలని బెదిరిస్తున్నారని, న్యాయం జరిగేవరకు విడిచేదే లేదని అన్నారు. తన న్యాయమైన పోరాటానికి మద్దతు తెలుపుతున్నవారికి రుణపడి ఉంటానని తెలిపారు.

తనతోపాటు విశ్వవిద్యాలయంలో ఇంకా చాలా మంది వీసీ బాధితులున్నారని చెప్పారు. టాసా ప్రధాన కార్యదర్శి డాక్టర్‌ చల్లా సౌజన్య మాట్లాడుతూ కొందరు ఉన్నతాధికారులు ఇష్టానుసారంగా వ్యవహరిస్తున్నారని మండిపడ్డారు. మహిళలతో అసభ్యంగా వ్యవహరించినవారు ఎంతటివారైనా సంహిచవద్దన్నారు. బాధితురాలికి న్యాయం జరిగేవరకు నిరంతరం నిరసనలు కొనసాగిస్తామన్నారు. టాసా అధ్యక్షులు పవన్‌ చంద్రారెడ్డి, రాష్ట్ర నాయకులు అమృత్‌రెడ్డి, డాక్టర్‌ సునీత, ప్రశాంత్‌, డాక్టర్‌ రామకృష్ణ తదిరులు కార్యక్రమంలో పాల్గొని బాధితురాలికి మద్దతు తెలిపారు.