ట్రూఅప్‌ చార్జీల షాక్‌

విద్యుత్తు వినియోగదారులపై రూ.5,420 కోట్ల భారం.. నవంబర్‌ నుంచి యూనిట్‌పై 30..డిసెంబర్‌ నుంచి 50పైసల భారం.

హైదరాబాద్‌, అక్టోబర్‌ 5 (నమస్తే తెలంగాణ): రాష్ట్రంలో విద్యుత్తు వివినియోగదారులపై వచ్చేనెల నుంచి రూ.5,420.23 కోట్ల అదనపు భారం పడనుంది. ట్రూఅప్‌ చార్జీల రూపంలో ఈ మొత్తాన్ని వసూలు చేసేందుకు తెలంగాణ విద్యుత్తు నియంత్రణ మండలి (ఈఆర్సీ) అనుమతినిచ్చింది.

2022-23 విద్యు త్తు కొనుగోలు వ్యయాలు, 2023-24 ఆదా య లోటు (రెవెన్యూ ట్రూ అప్‌) కింద మొత్తం రూ.7,635.22 కోట్ల బకాయిలను వసూలు చేయడానికి ఈఆర్సీ అనుమతినిస్తూ సోమవారం ఆర్డర్‌ పాస్‌ చేసింది. ఇందులో వ్యవసాయ రంగానికి చెందినవి రూ.2,214.99 కోట్లున్నాయి. అయితే వ్యవసాయ వినియోగదారులపై ఎలాంటి ట్రూ-అప్‌ చార్జీలు విధించకూడదని ఈఆర్సీ స్పష్టం చేసింది. ఈ బకాయిలను ప్రభుత్వం నుంచే డిస్కమ్‌లు రాబట్టుకోవాలని స్పష్టంచేసింది.

నవంబర్‌ నుంచే మోత

వచ్చే నవంబర్‌ నుంచి జారీ చేసే బిల్లుల నుంచే అదనపు బిల్లుల వాత ప్రారంభం కానుంది. దక్షిణ డిస్కమ్‌ పరిధిలో 29 నెలలు.. ఉత్తర డిస్కమ్‌ పరిధిలో 26 నెలల పాటు ఈ రికవరీ కొనసాగుతుంది. నవంబర్‌లో ఒక యూనిట్‌కు 30 పైసలు, డిసెంబర్‌ నుంచి ఒక యూనిట్‌కు 50 పైసల చొప్పున ఇప్పుడున్న టారిఫ్‌కు అదనంగా వసూలు చేస్తారు. మొదట 2022-23, 2023-24 సంవత్సరాల్లో వినియోగదారులు వాడిన వార్షిక విద్యుత్తు ఆధారంగా సగటు నెలవారీ వినియోగాన్ని లెకిస్తారు. సగటు వినియోగానికి అదనపు రేటును గుణించి నెలవారీ బిల్లులో ప్రత్యేకంగా చూపుతారు.