ఆర్యవీర్‌ అదుర్స్‌

అండర్‌-19 ఆసియా కప్‌ క్రికెట్‌ టోర్నీలో యువ భారత జట్టు శుభారంభం చేసింది.

• యువ భారత్‌ శుభారంభం

ఒమన్‌: అండర్‌-19 ఆసియా కప్‌ క్రికెట్‌ టోర్నీలో యువ భారత జట్టు శుభారంభం చేసింది. శుక్రవారం తమ తొలి మ్యాచ్‌లో భారత్‌.. 10 వికెట్ల తేడాతో నేపాల్‌ను చిత్తుగా ఓడించింది. టాస్‌ గెలిచి మొదట ప్రత్యర్థికి బ్యాటింగ్‌ అప్పగించిన భారత్‌.. నేపాల్‌ను 128 రన్స్‌కే కట్టడి చేసింది. పేసర్‌ ఇషాన్‌ సూద్‌ (3/18) కొత్త బంతితో నిప్పులు చెరగడంతో నేపాల్‌ క్రమం తప్పకుండా వికెట్లు కోల్పోయింది. ఇషాన్‌కు తోడుగా హైదరాబాదీ బౌలర్‌ యశ్వీర్‌ గౌడ్‌ (2/25) రెండు వికెట్లు తీయగా అర్జున్‌ రాజ్‌పుత్‌ (3/8) లోయరార్డర్‌ పనిపట్టాడు. ఛేదనలో వీరేంద్ర సెహ్వాగ్‌ తనయుడు ఆర్యవీర్‌ (52 బంతుల్లో 7 ఫోర్లు, 4 సిక్స్‌లతో 70 నాటౌట్‌), కెప్టెన్‌ లక్ష్య రాయ్‌చందని (53 నాటౌట్‌) అజేయ అర్ధశతకాలు బాదడంతో భారత్‌ 19.1 ఓవర్లకే లక్ష్యాన్ని ఊదేసింది.