Shakib Ali Hasan : వన్డే వరల్డ్ కప్ వైఫల్యంతో బంగ్లాదేశ్ కెప్టెన్ షకిబుల్ హసన్(Shakib Ali Hasan) కీలక నిర్ణయం తీసుకున్నాడు. ఈ స్టార్ ఆల్రౌండర్ బంగ్లా రాజకీయాల్లోకి ఎంట్రీ ఇస్తున్నాడు. అవును.. త్వరలో జరుగబోయే 12వ పార్లమెంటరీ ఎన్నికల్లో షకీబ్ తన అదృష్టాన్ని పరీక్షించుకోనున్నాడు. బంగ్లా కెప్టెన్ తన సొంత జిల్లా అయిన మగుర-1 నియోజకవర్గం నుంచి పోటీ చేయనున్నాడు. వచ్చే ఏడాది జనవరి 7 నుంచి బంగ్లాదేశ్లో ఎంపీ ఎన్నికలు జరుగనున్నాయి.
బంగ్లా ఆటగాళ్లు రాజకీయాల్లోకి రావడం ఇదే కొత్తకాదు. మాజీ కెప్టెన్ ముష్రఫే మొర్తాజా(Mashrafe Mortaza) గత ఎన్నికల్లో ఎంపీగా గెలిచాడు. అతడు నరేల్ నియోజకవర్గం నుంచి పార్లమెంట్కు ఎంపికయ్యాడు. అంతేకాదు ప్రస్తుతం బంగ్లా క్రికెట్ బోర్డు అధ్యక్షుడు షఫిఉల్ అలాం చౌదరీ కూడా 2009లో ఎంపీగా సేవలందించాడు.
షకిబుల్ హసన్
ఆసియా కప్ ముందు వన్డే కెప్టెన్గా తమీమ్ ఇక్బాల్(Tamim Iqbal) తప్పుకోవడంతో షకీబ్ మరోసారి సారథిగా ఎంపకియ్యాడు. అయితే.. ఆసియాకప్లో బంగ్లా సెమీస్ చేరలేకపోయింది. వరల్డ్ కప్లోనూ ఆ జట్టు పేలవ ప్రదర్శనతో నిరాశపరిచింది. కెప్టెన్గా ఫెయిలైన షకీబ్.. బ్యాటుతో, బంతితోనూ ఆకట్టుకోలేకపోయాడు. 9 వికెట్లు తీసి, 186 పరుగులు చేశాడంతే. అంతేకాదు శ్రీలంకతో జరిగిన లీగ్ మ్యాచులో షకీబ్.. ఎంజెలో మాథ్యూస్ టైమ్డ్ ఔట్(Timed Out)తో వార్తల్లో నిలిచాడు. ఆ మ్యాచ్లో బ్యాటింగ్ చేస్తుండగా షకీబ్ ఎడమ చేతి వేలికి గాయమైంది. దాంతో, అతడు ఆస్ట్రేలియాతో చివరి లీగ్ మ్యాచ్కు దూరమయ్యాడు.