తమకు నచ్చిన ఆటగాడు అద్భుతంగా ఆడినప్పుడు వారి విజయాన్ని సెలబ్రేట్ చేసుకోవడంలో ఒక్కొక్కరిది ఒక్కో శైలి. అయితే ఆ అభిమానం హద్దులు మీరితే చూడటానికి వికారంగా ఉంటుంది. ప్రస్తుతం ఇంగ్లండ్ క్రికెట్ అభిమానుల అభిమానం కూడా ఇలాగే మారింది. బర్మీ ఆర్మీగా పిలుచుకునే వీరంతా తాజాగా ఆ జట్టు ఆటగాడు బెయిర్ స్టో మీదకు తాము వేసుకున్న చెప్పులు, షూ తీసి చూపించారు. కంగారు పడకండి.. ఇదో రకం సెలబ్రేషన్ అట..
ఇంగ్లండ్-న్యూజిలాండ్ మధ్య లీడ్స్ లోని హెడ్డింగ్లీ వేదికగా జరుగుతున్న మూడో టెస్టులో భాగంగా ఆతిథ్య జట్టు తొలి ఇన్నింగ్స్ లో 55 పరుగులకే ఆరు వికెట్లు కోల్పోయింది. ఆ క్రమంలో ఇంగ్లీష్ బ్యాటర్ బెయిర్ స్టో (130 బ్యాటింగ్) వీరోచిత పోరాటం చేశాడు. టీ20 ఆటను తలపిస్తూ బౌండరీల మీద బౌండరీలు బాదుతూ ఇంగ్లండ్ ను ఆదుకున్నాడు. జెమీ ఓవర్టన్ (89 నాటౌట్) తో కలిసి ఏడో వికెట్ కు 209 పరుగులను జోడించాడు.
కాగా బెయిర్ స్టో సెంచరీ చేసిన తర్వాత బర్మీ ఆర్మీ అభిమానులు.. తాము వేసుకున్న షూస్, చెప్పులు తీసి వాటిని చేత పట్టి అతడికి అభివాదం చేశారు. ‘మీరు బెయిర్ స్టో అభిమానులైతే షూస్ తీయండి..’ అని హెడ్డింగ్లీ స్టేడియం మార్మోగిపోయింది. దీంతో మ్యాచ్ చూడటానికి వచ్చినోళ్లలో చాలా మంది షూస్, చెప్పులు తీసి ‘బెయిర్ స్టో.. బెయిర్ స్టో’ అని అరవడం గమనార్హం. ఇది చూసిన నెటిజన్లు ‘ఇదేం పైత్యమో మరి..’ అని అనుకుంటున్నారు.
ఈ వీడియోను బర్మీ ఆర్మీ తన ట్విటర్ ఖాతాలో షేర్ చేసింది. ఇక ఈ టెస్టులో సెంచరీ చేసిన బెయిర్ స్టో.. రెండో టెస్టు లో కూడా దాటిగా ఆడి ఇంగ్లండ్ విజయంలో కీలక పాత్ర పోషించిన విషయం తెలిసిందే.
🎶 Shoes off, if you love Bairstow! 🎶#ENGvNZ pic.twitter.com/AAQ2vKUjNS
— Jonny Bairstow’s Barmy Army (@TheBarmyArmy) June 24, 2022