క్వార్టర్స్‌కు సబలెంకా, సిన్నర్‌

ఫ్రెంచ్‌ ఓపెన్‌కు ముందు జరుగుతున్న మ్యాడ్రిడ్‌ ఓపెన్‌లో టాప్‌ టెన్నిస్‌ ప్లేయర్లు అరీనా సబలెంకా, యానిక్‌ సిన్నర్‌ క్వార్టర్స్‌ చేరారు.

మ్యాడ్రిడ్‌: ఫ్రెంచ్‌ ఓపెన్‌కు ముందు జరుగుతున్న మ్యాడ్రిడ్‌ ఓపెన్‌లో టాప్‌ టెన్నిస్‌ ప్లేయర్లు అరీనా సబలెంకా, యానిక్‌ సిన్నర్‌ క్వార్టర్స్‌ చేరారు. మహిళల సింగిల్స్‌ ప్రిక్వార్టర్స్‌లో ప్రపంచ నంబర్‌ వన్‌ సబలెంకా.. 6-7 (1/7), 6-3, 6-2తో నవొమి ఒసాకా (జపాన్‌)ను ఓడించింది. కానీ మూడో సీడ్‌ కోకో గాఫ్‌ (అమెరికా).. 4-6, 6-1, 5-7 (5/7)తో నొస్కొవ (చెక్‌ రిపబ్లిక్‌) చేతిలో ఓడింది.

ఈ ఏడాది ఆరంభంలో ఆస్ట్రేలియా ఓపెన్‌ గెలిచిన ఎలీనా రిబాకినా (కజకిస్థాన్‌) సైతం.. 6-7 (8/10), 4-6తో పొటపొవ (ఆస్ట్రియా) జోరుకు తలవంచింది. పురుషుల సింగిల్స్‌లో టాప్‌ సీడ్‌ సిన్నర్‌ (ఇటలీ).. 6-2, 7-5తో కామెరూన్‌ నూరీ (బ్రిటన్‌)పై అవలీల విజయం సాధించి క్వార్టర్స్‌ చేరగా రెండో సీడ్‌ జ్వెరెవ్‌ (జర్మనీ).. 6-3, 7-6 (7/2)తో టెరెన్స్‌ అట్మనె (ఫ్రాన్స్‌) పై గెలిచి ప్రిక్వార్టర్స్‌కు ప్రవేశించాడు.