తూకం రాళ్లు

ఇక్కడ కలువ పూలు ఎన్ని పరిమళాలొలికి ఎంతగా దేశాన్ని కీర్తి గుబాళింపుతో పరిమళభరితం చేసినా పుట్టిన బురదలోనే తొక్కబడతాయి

ఇక్కడ కలువ పూలు
ఎన్ని పరిమళాలొలికి
ఎంతగా దేశాన్ని
కీర్తి గుబాళింపుతో
పరిమళభరితం చేసినా
పుట్టిన బురదలోనే తొక్కబడతాయి

ఉన్నోళ్లకు పట్టం కట్టే
కురచ చేతులే అన్నీ
పేదరికంతో మట్టికొట్టుకుపోయిన
దుస్తులను శుభ్రంచేసే
చేతులు మొలవవిక్కడ

పేదరికం, కులవివక్షతో
ఆటంకాలు అయినప్పుడు
ఇక్కడ ఏ ప్రతిభకైనా
సమాధి కట్టబడుతుంది
వివక్షల బండరాళ్లను చీల్చుకుంటూ
మొక్కలా ఎదిగి పూలు పూసినా
ప్రతిభకు గీటురాయిలా
దేశ పటం మీద కీర్తిపతాకమైనా
పేదరికం గొంతు నులిమి చంపేస్తుంది

చూపించిన ప్రతిభంతా
సాధించిన మెడల్సునే
త్రాసులో తూకం రాళ్లుగా వేసి
కనీస జీవనానికి రోడ్డు పక్కన
కూరగాయలమ్ముకుంటూ కనిపిస్తుంది!
(అంతర్జాతీయ మెడల్స్‌ సాధించి
రోడ్డు పక్కన కూరగాయలు అమ్ముతూ
జీవనం సాగిస్తున్న జార్ఖండ్‌కు చెందిన క్రీడాకారిణి పుష్ప దుస్థితిని చూసి)

-చిత్తలూరి సత్యనారాయణ
91338 32246