16న ఉక్రెయిన్‌పై రష్యా దాడి!

• అమెరికాకు అందిన నిఘా సమాచారం

వాషింగ్టన్‌, ఫిబ్రవరి 12: ఈనెల 16న ఉక్రెయిన్‌పై దాడి చేసేందుకు రష్యా ప్రణాళికలు వేసుకున్నదని నిఘా వర్గాలు వెల్లడించాయి. ఆక్రమణకు సంబంధించిన ప్లాన్‌ అమెరికా సీక్రెట్‌ సర్వీస్‌ సీఐఏ, రక్షణ శాఖకు అందిందని జర్మన్‌ పత్రిక డెర్‌ స్పీగెల్‌ నివేదించింది. ఈ నేపథ్యంలో యుద్ధాన్ని నివారించేందుకు అమెరికా అధ్యక్షుడు జో బైడెన్‌.. రష్యా అధ్యక్షుడు పుతిన్‌తో శనివారం ఫోన్‌లో సంభాషించారు. ఉక్రెయిన్‌పై దాడికి పాల్పడితే తీవ్ర పరిణామాలు తప్పవని హెచ్చరించారు. నాటో మిత్రదేశాలతో అమెరికా ప్రభుత్వం రహస్య చర్చలు జరిపిందని డైలీ మెయిల్‌ తెలిపింది. మరోవైపు ఉక్రెయిన్‌ సరిహద్దుకు రష్యా పెద్ద ఎత్తున సైన్యాన్ని తరలించింది. ఇదే సమయంలో బెలారస్‌లో జరుగుతున్న సైనిక విన్యాసాలకు కూడా బలగాలను పంపింది.

అమెరికా దౌత్య సిబ్బం ది వెనక్కు

ఉక్రెయిన్‌పై రష్యా ఏ క్షణమైనా దాడి చేయవచ్చన్న వార్తల నేపథ్యంలో అమెరికా మరో కీలక నిర్ణయం తీసుకున్నది. ఉక్రెయిన్‌ రాజధాని కీవ్‌లోని రాయబార కార్యాలయాన్ని ఖాళీ చేయాలని యోచిస్తున్నది. ఉక్రెయిన్‌ విడిచి రావాలని తమ పౌరులను బైడెన్‌ ఇదివరకే కోరారు. మరోవైపు, మరో 3 వేల మంది బలగాలను ఉక్రెయిన్‌ పొరుగు దేశమైన పొలాండ్‌కు అమెరికా తరలించనుంది. ఇప్పటికే అక్కడ 1,700 మంది అమెరికా సైనికులు ఉన్నారు. జర్మనీలో ఉన్న వెయ్యి మంది అమెరికా సైనికులను కూడా రొమేనియాకు పంపుతున్నది.