రావణుడితో పోరుకు సిద్ధం

రవితేజ కథానాయకుడిగా నటిస్తున్న తాజా చిత్రం ‘రావణాసుర’. సుధీర్‌వర్మ దర్శకుడు. ఈ సినిమాలో యువ హీరో సుశాంత్‌ కీలక పాత్రను పోషిస్తున్నారు. అభిషేక్‌ నామా నిర్మిస్తున్న ఈ చిత్రం ఇటీవలే భారీ షెడ్యూల్‌ను పూర్తిచేసుకుంది. ఇందులో రవితేజ, సుశాంత్‌ పాల్గొన్నారు. శుక్రవారం సుశాంత్‌ జన్మదినం. ఈ సందర్భంగా చిత్ర బృందం ఆయనకు శుభాకాంక్షలు తెలియజేస్తూ కొత్త పోస్టర్‌ను విడుదల చేసింది. ఈ స్టిల్‌లో ఆయన పొడవాటి జుట్టు, గడ్డంతో రఫ్‌ లుక్‌లో కనిపిస్తున్నారు. ‘రోమాంచితమైన యాక్షన్‌ థ్రిల్లర్‌ ఇది. రవితేజ, సుశాంత్‌ పాత్రలు పోటాపోటీగా సాగుతాయి. ఈ సినిమాలో రవితేజ లాయర్‌ పాత్రలో కనిపిస్తారు’ అని చిత్రబృందం తెలిపింది. అను ఇమ్మాన్యుయేల్‌, మేఘా ఆకాష్‌, ఫరియా అబ్దుల్లా, దక్షా నగార్కర్‌, పూజిత పొన్నాడ, రావు రమేష్‌, మురళీశర్మ, సంపత్‌రాజ్‌ తదితరులు నటిస్తున్న ఈ చిత్రానికి కెమెరా: విజయ్‌ కార్తీక్‌ కన్నన్‌, సంగీతం: హర్షవర్ధన్‌ రామేశ్వర్‌, భీమ్స్‌, కథ, స్క్రీన్‌ప్లే, సంభాషణలు: శ్రీకాంత్‌ విస్సా, నిర్మాణ సంస్థలు: అభిషేక్‌ పిక్చర్స్‌, ఆర్‌టీ టీమ్‌ వర్క్స్‌, దర్శకత్వం: సుధీర్‌వర్మ.

సుశాంత్‌ వెబ్‌సిరీస్‌ అరంగేట్రం

ప్రస్తుతం అగ్ర హీరోలు కూడా ఓటీటీ బాట పడుతున్నారు. వినూత్న కథాంశాలతో ప్రయోగాలు చేసే వీలుండటంతో సినిమాలతో పాటు ఓటీటీ వేదికల్లో కూడా తమ అదృష్టాన్ని పరీక్షించుకుంటున్నారు. తాజాగా హీరో సుశాంత్‌ కూడా ఓటీటీలో అరంగేట్రం చేస్తూ ఓ వెబ్‌సిరీస్‌లో నటిస్తున్నారు. జీ5 తెరకెక్కిస్తున్న ఈ సిరీస్‌ ప్రస్తుతం చిత్రీకరణ జరుపుకొంటున్నది. కొల్లా ఎంటర్‌టైన్‌మెంట్స్‌ పతాకంపై ప్రవీణ్‌ కొల్లా నిర్మిస్తున్న ఈ వెబ్‌సిరీస్‌కు లక్ష్మి సౌజన్య దర్శకత్వం వహిస్తున్నారు. ఇందులో సుశాంత్‌ పోలీస్‌ ఆఫీసర్‌గా నటిస్తున్నారు. తన కెరీర్‌లో ఇదొక విభిన్నమైన ప్రయాణమని సుశాంత్‌ ఆనందం వ్యక్తం చేశారు.