F3 Movie | ‘ఎఫ్‌3’ పార్టీ వీడియో సాంగ్ విడుద‌ల‌.. ఆక‌ట్టుకుంటున్న పూజా స్టెప్స్‌!

F3 Movie | హిట్ట‌యిన సినిమాకు సీక్వెల్ తెర‌కెక్కుతుంది అంటే ప్రేక్ష‌కుల‌లో ఆ చిత్రంపై తారా స్థాయిలో అంచ‌నాలుంటాయి. అలాంటి అంచ‌నాల‌తోనే వ‌స్తున్న చిత్రం ‘ఎఫ్‌3’. వెంక‌టేష్‌, వ‌రుణ్ తేజ్ ప్ర‌ధాన పాత్ర‌ల్లో న‌టించిన ఈ చిత్రానికి అనీల్ రావిపూడి ద‌ర్శ‌క‌త్వం వ‌హించాడు. 2019లో సంక్రాంతి కానుక‌గా విడుద‌లై భారీ విజ‌యాన్ని సాధించిన ‘ఎఫ్‌2’ చిత్రానికి సీక్వెల్‌గా ఈ చిత్రం తెర‌కెక్కింది. ఈ చిత్రంపై మొద‌టి నుంచే ప్రేక్ష‌కుల‌లో భారీ అంచ‌నాలు నెల‌కొన్నాయి. ఇక ఇటీవ‌లే విడుద‌లైన ట్రైల‌ర్ మరింత అంచ‌నాల‌ను పెంచింది. కామెడీ ఎంట‌ర్టైన‌ర్‌గా తెర‌కెక్కిన ఈ చిత్రం మే27న విడుద‌ల కానుంది. ఈ క్ర‌మంలో చిత్ర బృందం త‌ర‌చూ ఏదో ఒక అప్‌డేట్‌తో ప్రేక్ష‌కుల అటెన్ష‌న్‌ను తిప్పుకుంటుంది. తాజాగా ఈ చిత్రంలోని స్పెష‌ల్ సాంగ్ వీడియోను మేక‌ర్స్ విడుద‌ల చేశారు.

‘లైఫ్ అంటే ఇట్టా ఉండాలా’ అంటూ సాగే వీడియో సాంగ్‌ను మేక‌ర్స్ విడుద‌ల చేశారు. 1.20 నిమిషాల నిడివిగ‌ల ఈ వీడియో సాంగ్ ప్రేక్ష‌కుల‌ను ఆక‌ట్టుకుంటుంది. పూజాహెగ్డే ఈ స్పెష‌ల్ సాంగ్‌లో న‌ర్తించింది. దేవీ శ్రీ ప్ర‌సాద్ స్వ‌ర ప‌రిచిన ఈ పాట‌కు కాస‌ర్ల శ్యామ్ సాహిత్యాన్ని అందించ‌గా, రాహుల్ సిప్లీగంజ్‌, గీతా మాధురి ఆల‌పించారు. ఈ చిత్రాన్ని శ్రీ వెంకటేశ్వ‌రా క్రియేష‌న్స్ ప‌తాకంపై దిల్‌రాజు, శిరీష్‌లు నిర్మించారు. వెంకీ, వ‌రుణ్‌ల‌కు జోడీగా త‌మ‌న్నా, మెహ‌రిన్‌లు క‌థానాయిక‌లుగా న‌టించారు. సునీల్, సోనాల్‌చౌహ‌న్‌లు కీల‌క‌పాత్ర‌ల్లో న‌టించారు.