బిల్కిస్.. నువ్వలా చూడకు
నీ చూపులకు ఎగురవేసిన జెండా
ఇంకా కొట్టుమిట్టాడుతూనే ఉన్నది
నీలాగే.. అచ్చం నీలాగే..
కాషాయపు ముడిలో చిక్కుకొని స్వేచ్ఛకై నినదిస్తున్నది
మనదీ.. కర్మ భూమి కదా బిల్కిస్
గంజి తాగే నోటిలో ’అమృతం’ కురుస్తుందా చెప్పు?
మగసిరిని బజార్లో ఎత్తుకొని
ఊరేగిస్తూ జేజేలు కొడుతున్న దేశం మనది
నీ కన్నీటి చుక్కల్ని ఎవరు తుడుస్తారు చెప్పు బిల్కిస్?
సెక్షన్లు, జీ.వోలు
మనకు ఎప్పుడూ అందని ద్రాక్షనే కదా
కోర్టు కళ్ళు మూసుకుంది నల్లచొక్కాలు చేతులెత్తేశాయి
చట్టం తన పని తాను చేసుకెళ్ళింది
ఎప్పటిలాగే మనం బలిపశువులుగా మిగిలాం అంతే!
బిల్కిస్.. తిరుగబడ్డ గాయం సాక్షిగా
ఇప్పుడు ఈ దేశం జెండా కూడా
పచ్చి గాయాల వాసనేస్తున్నది!
– బిల్ల మహేందర్
9177604430