లక్నో: ఒక యువకుడికి ఇన్స్టాగ్రామ్లో మహిళ పరిచయమైంది. వారిద్దరి మధ్య స్నేహం కాస్తా ప్రేమగా మారింది. దీంతో వారిద్దరూ స్వయంగా కలుసుకోవాలని నిర్ణయించారు. అయితే ఆ మహిళను చూసి ఆమె వయస్సు 45 ఏళ్లుగా తెలుసుకున్న ఆ యువకుడు షాక్ అయ్యాడు. ఆగ్రహంతో ఆమెను కొట్టాడు. (Youth beats woman) ఉత్తరప్రదేశ్లోని కాన్పూర్లో ఈ సంఘటన జరిగింది. 20 ఏళ్ల దీపేంద్ర సింగ్కు ఇన్స్టాగ్రామ్లో ఒక మహిళ పరిచయమైంది. ప్రొఫైల్ ఫొటో యంగ్గా ఉండటంతో ఆమెతో చాట్ చేశాడు. ఆన్లైన్ స్నేహం కాస్తా వారిద్దరి మధ్య ప్రేమకు దారి తీసింది. దీంతో ఒకసారి కలుసుకోవాలని భావించారు.
కాగా, దీపేంద్ర సింగ్, ఆ మహిళ స్వయంగా కలుసుకున్నారు. అయితే వయసులో పెద్దగా ఆమె ఉండటం చూసి అతడు షాక్ అయ్యాడు. దీని గురించి ఆ మహిళను ఆరా తీయగా తన వయస్సు 45 ఏళ్లు అని చెప్పింది. దీంతో ఆగ్రహించిన దీపేంద్ర సింగ్ ఆ మహిళను కొట్టాడు. ఆమె తలను నేలకేసి బాదాడు. ఆ మహిళ మొబైల్ ఫోన్ లాక్కొని అక్కడి నుంచి పారిపోయాడు.
మరోవైపు గుర్తు తెలియని వ్యక్తి తనను కొట్టి మొబైల్ ఫోన్ చోరీ చేశాడని ఆ మహిళ పోలీసులకు ఫిర్యాదు చేసింది. దర్యాప్తు చేయగా ఆ మహిళ ఇన్స్టాగ్రామ్ స్నేహితుడు దీపేంద్ర సింగ్ను నిందితుడిగా గుర్తించారు. అతడ్ని అరెస్ట్ చేయడంతోపాటు పలు సెక్షన్ల కింద కేసు నమోదు చేశారు.