Ministry of Sex | జననాల రేటు పెంచేందుకు.. శృంగార మంత్రిత్వ శాఖ!

మీరు చదివింది నిజమే! శృంగార మంత్రిత్వ శాఖ ఏర్పాటుకు రష్యా ప్రభుత్వం సమాయత్తం అవుతున్నది. గతంలో ఎన్నడూ లేనంతగా జననాల రేటు పడిపోవడం, మరోవైపు ఉక్రెయిన్‌తో యుద్ధం కారణంగా సంభవిస్తున్న ప్రాణనష్టంతో ఆందోళన మొదలైంది.

Ministry of Sex | న్యూఢిల్లీ: మీరు చదివింది నిజమే! శృంగార మంత్రిత్వ శాఖ ఏర్పాటుకు రష్యా ప్రభుత్వం సమాయత్తం అవుతున్నది. గతంలో ఎన్నడూ లేనంతగా జననాల రేటు పడిపోవడం, మరోవైపు ఉక్రెయిన్‌తో యుద్ధం కారణంగా సంభవిస్తున్న ప్రాణనష్టంతో ఆందోళన మొదలైంది. ఈ నేపథ్యంలో అప్రమత్తమైన ప్రభుత్వం జననాల రేటు పెంచేందుకు రెడీ అవుతున్నది. అందులో భాగంగా శృంగారం కోసం ప్రత్యేకంగా ఓ శాఖను ఏర్పాటు చేయాలన్న నిర్ణయానికి వచ్చింది. ఇక, జననాల రేటు పెంచడంలో భాగంగా రాత్రివేళ ఇంటర్నెట్‌ పూర్తిగా ఆఫ్‌ చేయడం, కరెంటు తీసేయడం వంటి పలు ఆలోచనలు చేస్తున్నది. దీనివల్ల జంటల మధ్య సాన్నిహిత్యం పెరుగుతుందని, అది జననాల రేటు పెరిగేందుకు దోహదం చేస్తుందని భావిస్తున్నది. 1999 తర్వాత తొలిసారి ఈ ఏడాది తొలి ఆరు నెలల్లో జననాల రేటు దారుణంగా పడిపోయింది.

ఈ ‘విపత్తు’ నుంచి గట్టెక్కేందుకు ‘మినిస్ట్రీ ఆఫ్‌ సెక్స్‌’ (శృంగార మంత్రిత్వశాఖ)ను ఏర్పాటు చేయాలన్న డిమాండ్‌ పెరుగుతున్న నేపథ్యంలో ఈ అంశాన్ని ప్రభుత్వం పరిశీలిస్తున్నది. అలాగే ఇంటర్నెట్‌ సేవలను రాత్రివేళ నిలిపివేయడంతోపాటు రాత్రి 10 గంటల నుంచి తెల్లవారుజామున 2 గంటల వరకు విద్యుత్తు సరఫరాను నిలిపివేయాలని భావిస్తున్నది. జననాల రేటు పెంచేందుకు ఇలాంటి పలు ఐడియాలను ప్రభుత్వం పరిశీలిస్తున్నది.

ఇంట్లో ఉండే తల్లలుకు ‘వేతనం’ ఇవ్వడం, వివాహం తర్వాత హోటళ్లలో బస చేసే జంటకు అయ్యే ఖర్చును భరించడం, డేటింగ్‌ను ప్రోత్సహించడం వంటి పలు ఆలోచనలను పరిశీలిస్తున్నది. ఈ ఏడాది తొలి ఆరు నెలల్లో రష్యాలో 5,99,600 జననాలు మాత్రమే నమోదయ్యాయి. గతేడాది ఇదే సమయంతో పోలిస్తే 16 వేల జననాలు తక్కువగా నమోదయ్యాయి. జననాల రేటు ఇంత దారుణంగా పడిపోవడం 1999తో పోలిస్తే ఇదే తొలిసారి.