Visit:
House workers : గ్రేటర్ నోయిడా (Greater Noida) లో ఇంట్లో పనిచేసే మహిళపై యజమాని దాడికి పాల్పడ్డారు. నోయిడాలోని గౌర్ సిటీ (Gaur city) లోగల 11th అవెన్యూ అపార్టుమెంట్ కాంప్లెక్స్లో ఈ ఘటన చోటుచేసుకుంది. ఈ దాడి ఘటన స్నబ్బిట్ (Snabbit) అనే ఇన్స్టాంట్ యాప్ ద్వారా క్షణాల్లో సిటీ అంతా పాకింది. దాంతో సిటీలోని పనిమనుషులంతా కలిసి బాధితురాలికి న్యాయం జరిగేదాకా పనులు చేయవద్దని నిర్ణయించుకున్నారు.
దాడి ఘటనను నిరసిస్తూ.. 11th అవెన్యూ అపార్టుమెంట్ కాంప్లెక్స్ ముందు ఆందోళనకు దిగారు. పనిమనుషులు సేవలు నిలిపేయడంతో గౌర్ సిటీతోపాటు పరిసర ప్రాంతాల వాసులు తీవ్ర ఇబ్బందులు పడుతున్నారు. వారు పనిమనుషులను బుక్ చేసుకోవడం కోసం స్నబ్బిట్లో ఎంత ప్రయత్నించినా బుకింగ్ క్యాన్సిల్ అనే మెస్సేజ్ వస్తోంది. కాగా పనిమనుషుల నిరసనకు సంబంధించిన సమాచారం అందుకున్న పోలీసులు ఘటనా ప్రాంతానికి చేరుకున్నారు.
ఆందోళనకారులకు నచ్చజెప్పి అక్కడి నుంచి పంపించారు. పోలీసులు నచ్చజెప్పడంతో పనిమనుషులు శాంతియుతంగా అక్కడి నుంచి వెళ్లిపోయారు. అయితే ఈ దాడి ఘటనపై ఇంతవరకు అధికారికంగా ఎలాంటి ఫిర్యాదులు నమోదు కాలేదు.
