నకిలీ కోర్టు ఉత్తర్వులతో పరేషాన్‌!

శ్రీనగర్‌కు చెందిన 12వ తరగతి విద్యార్థి(17 ఏండ్లు) ఎక్స్‌(ఇదివరకటి ట్విట్టర్‌) ప్లాట్‌ఫామ్‌కు నకిలీ సోషల్‌ మీడియా నోటీసులను పంపినట్టు ఈ నెల 6న ఢిల్లీ హైకోర్టులో జరిగిన విచారణలో వెల్లడైంది.

• న్యాయవ్యవస్థకే సవాలుగా మారిన ఏఐ మాయగాళ్లు

న్యూఢిల్లీ, నవంబర్‌ 14: శ్రీనగర్‌కు చెందిన 12వ తరగతి విద్యార్థి(17 ఏండ్లు) ఎక్స్‌(ఇదివరకటి ట్విట్టర్‌) ప్లాట్‌ఫామ్‌కు నకిలీ సోషల్‌ మీడియా నోటీసులను పంపినట్టు ఈ నెల 6న ఢిల్లీ హైకోర్టులో జరిగిన విచారణలో వెల్లడైంది. ఢిల్లీ పోలీసుల పేరుతో జారీ చేసినట్టు కనిపిస్తున్న ఆ నోటీసులు నకిలీవని తమ అంతర్గత విచారణలో తేలిందని ఎక్స్‌ సంస్థ కోర్టుకు తెలియచేసింది. ఢిల్లీ పోలీసుల గుర్తింపును ఒక అపరిచిత వ్యక్తి మోసపూరితంగా ఉపయోగించుకొని ఇంటర్నెట్‌ ఫ్రీడమ్‌ ఫౌండేషన్‌(ఐఎఫ్‌ఎఫ్‌), సాఫ్ట్‌వేర్‌ ఫ్రీడమ్‌ లా సెంటర్‌(ఎస్‌ఎఫ్‌ఎల్‌సీ)లకు చెందిన ఖాతాలను నిలిపివేయాలని కోరినట్టు ఎక్స్‌ కోర్టుకు తెలియచేసింది. ఆ నోటీసుల ఆధారంగా తాము ఖాతాలను నిరోధించలేదని ఎక్స్‌ స్పష్టం చేసింది.

ఐఎఫ్‌ఎఫ్‌, ఎస్‌ఎఫ్‌ఎల్‌సీ సంస్థలకు అందిన ఆ నకిలీ నోటీసులను ఢిల్లీ పోలీసు అధికారిగా నటించిన ఎవరో పంపారని పేర్కొంది. ఈ ఉత్తర్వుల వెనుక ఉన్న న్యాయవాది, బీజేపీ మాతృసంస్థ ఆర్‌ఎస్‌ఎస్‌కు ప్రాతినిధ్యం వహిస్తున్నట్టు ఎస్‌ఎఫ్‌ఎల్‌సీ పేర్కొంది. కాగా, ఎఫ్‌ఎఫ్‌ సంస్థ ఆర్‌ఎస్‌ఎస్‌కు లేఖ రాసినప్పటికీ ఎటువంటి స్పందన రాలేదు. మరోవైపు ఎస్‌ఎఫ్‌ఎల్‌సీ సంస్థ ఢిల్లీ పోలీసులను సంప్రదించగా తాము ఎటువంటి నోటీసులు జారీ చేయలేదని వారు స్పష్టం చేశారు. నకిలీ వ్యక్తిని గుర్తించేందుకు తాము కూడా ఢిల్లీ పోలీసులకు ఫిర్యాదు చేశామని ఎక్స్‌ తరఫు న్యాయవాదులు కోర్టుకు తెలిపారు. ఢిల్లీ పోలీసుకు చెందిన క్రైమ్‌ బ్రాంచ్‌ గుర్తు తెలియని వ్యక్తులపై ఎఫ్‌ఐఆర్‌ నమోదు చేసి ఫోర్జరీ ఘటనపై దర్యాప్తు చేపట్టింది.

నకిలీ కోర్టు ఉత్తర్వులు

ఇలా ఉండగా నకిలీ కోర్టు ఉత్తర్వులను ప్రచారం చేయడం ద్వారా వెబ్‌సైట్‌లను తొలగించిన రెండు ఉదంతాలను రాయిటర్స్‌ వార్తాసంస్థ వెలికి తీసింది. జూలై, సెప్టెంబర్‌ నెలల్లో ఇవి జరిగినట్టు తెలుస్తున్నది. అలహాబాద్‌ హైకోర్టు, రాజస్థాన్‌ హైకోర్టు పేరుతో జారీ అయినట్టు కనిపిస్తున్న ఆ ఉత్తర్వులు నకిలీవని ఆ సంస్థ గుర్తించింది. దీనిపై అలహాబాద్‌ హైకోర్టు రిజిస్ట్రీ విచారణ ప్రారంభించి, ఆ ఉత్తర్వు నకిలీదని నిర్ధారించి, ఈ నెల 6న పోలీసులకు ఫిర్యాదు చేసింది. రాయిటర్స్‌ కథనం ప్రకారం ఈ ఈమెయిల్స్‌ను పంపిన వ్యక్తులు తమను తాము ఆర్యన్‌ చౌదరి(రాజస్థాన్‌ హైకోర్టు అడ్వకేట్‌-ఆన్‌-రికార్డ్‌ అని చెప్పుకున్న వ్యక్తి), కార్తికేయ పాండే(ఆగస్టు 22న అలహాబాద్‌ హైకోర్టుకు చెందిన నకిలీ ఉత్తర్వును అధికారులకు పంపిన వ్యక్తి)గా పేర్కొన్నారు.

న్యాయమూర్తుల్లో ఆందోళన

కృత్రిమ మేధ(ఏఐ) ద్వారా రూపొందించిన న్యాయపరమైన ఉత్తర్వుల దుర్వినియోగం ప్రపంచవ్యాప్తంగా న్యాయమూర్తుల్లో ఆందోళనలను రేకెత్తించింది. జూలైలో ఉనికిలో లేని తీర్పులపై ఆధారపడిన ట్రిబ్యునల్‌ ఉత్తర్వులను భారత సుప్రీంకోర్టు రద్దు చేయగా ఇటీవల ఒక అమెరికా న్యాయమూర్తి కల్పిత న్యాయపరమైన తీర్పులను ఉపయోగించినందుకు న్యాయవాదులను అనర్హులుగా ప్రకటించారు. ఇదిలా ఉండగా పశ్చిమ రాజస్థాన్‌, ఉత్తర ఉత్తర ప్రదేశ్‌ హైకోర్టు నుంచి వచ్చినట్టుగా భావిస్తున్న కోర్టు ఉత్తర్వుల కాపీలను ఈమెయిల్‌ ద్వారా జతచేసి, డజన్ల కొద్దీ వెబ్‌సైట్‌లను తొలగించాలని ఆదేశిస్తూ భారత టెలికమ్యూనికేషన్ల శాఖ జూలై 21, సెప్టెంబర్‌ 2 తేదీలలో ఉత్తర్వులను జారీచేయడం గమనార్హం.

రాజస్థాన్‌లోని సూరత్‌గఢ్‌లో ఇటీవల వెలుగుచూసిన మరో ఘటనలో పెరోల్‌పై జైలు నుంచి బయటకు వచ్చి షరతులను ఉల్లంఘించిన తన తండ్రిని కాపాడేందుకు కెనడాకు చెందిన ఒక ఐటీ ఇంజనీర్‌ నకిలీ పత్రాలతో న్యాయవ్యవస్థను మోసం చేయడానికి ప్రయత్నించాడు. ఆ టెకీ ఏఐని ఉపయోగించి రాజస్థాన్‌ హైకోర్టుకు చెందిన రాజ ముద్రలను యథాతథంగా ఫోర్జరీ చేశాడు. ఆ తర్వాత అతను అధికారిక పోర్టల్‌ను హ్యాక్‌ చేసి తాను తయారుచేసిన నకిలీ 30 రోజుల బెయిల్‌ ఉత్తర్వులను నేరుగా ప్రభుత్వ వ్యవస్థలోకి అప్‌లోడ్‌ చేశాడు. అయితే రిజిస్ట్రీలో తేడాలు అనుమానాలను రేకెత్తించడంతో వారి బండారం బయటపడింది. పంజాబ్‌లోని లూథియానాలో తండ్రీకొడుకులిద్దరూ అరెస్టు అయ్యారు.

మూడేండ్లలో మానవాళిని ఏఐ తుడిచిపెట్టేయగలదు: హింటన్‌

ఆర్టిఫిషియల్‌ ఇంటెలిజెన్స్‌ (ఏఐ) మానవాళిని తుడిచిపెట్టేసి ప్రపంచాన్ని తన ఆధీనంలోకి తీసుకునే ప్రమాదం మూడేండ్లలోనే ఉన్నదని ఏఐ గాడ్‌ ఫాదర్‌, నోబెల్‌ బహుమతి గ్రహీత జెఫ్రీ హింటన్‌ హెచ్చరించారు. ‘ఏఐ మనకంటే తెలివైనదిగా మారుతుందని, దాని గురించి కలవరపడవలసి ఉంటుందని నేను చెప్పుకొస్తున్నాను. ఇంతకుముందు దీనికి 10 ఏండ్లు పడుతుందని అనుకున్నాను. కానీ ఇప్పుడు 18 నెలల్లోనే జరిగే అవకాశం ఉన్నది. ఇది భయపెడుతున్నది’ అని ఆయన చెప్పారు. మనుషులకు బదులు ఏఐ స్వయంగా నిర్ణయాలు తీసుకునే స్థితి రావచ్చునని తెలిపారు.

బెట్టింగ్‌ సైట్ల బ్లాక్‌ వ్యవహారం.. టెలికం కార్యదర్శికి పీఎంవో పిలుపు

నకిలీ కోర్టు ఉత్తర్వుల ఆధారంగా 100కు పైగా వెబ్‌సైట్‌లను తొలగించాలని ఆదేశించిన వ్యవహారంపై తమ ఎదుట హాజరై వివరణ ఇవ్వాలని ప్రధాని మోదీ కార్యాలయం టెలికమ్యూనికేషన్స్‌ కార్యదర్శి అమిత్‌ అగర్వాల్‌ను శనివారం కోరినట్టు అధికారులు తెలిపారు. కేవలం ఏఐ ఉత్తర్వులు చూసి వారీ చర్య తీసుకున్నారా? దీని వెనుక ఎవరిదైనా హస్త ముందా అని అధికారులు ఆరా తీస్తున్నారు.