గేటు దూకి జంతర్‌ మంతర్‌లోకి.. పోలీసుల అదుపులో సీజేపీ నాయకులు

నిరసన ప్రదేశంగా గుర్తించిన జాబితా నుంచి అధికారులు తొలగించిన జంతర్‌ మంతర్‌లోకి గేటు దూకి ప్రవేశించినందుకు కాక్రోచ్‌ జనతా పార్టీ(సీజేపీ) నాయకులు సౌరవ్‌ దాస్‌, అశుతోశ్‌ రాంకాను మంగళవారం డిల్లీ పోలీసులు అదుపులోకి తీసుకున్నారు.

న్యూఢిల్లీ, అక్టోబర్‌ 13: ఇతర మద్దతుదారులతో పాటు సీజేపీ కార్యకర్త అజింక్యా షిండేను కూడా అదుపులోకి తీసుకున్నారు. అరెస్టు కావడానికి ముందు రాంకా ఎక్స్‌లో ఒక వీడియో క్లిప్‌ను పోస్ట్‌ చేశారు. అందులో, తాను, దాస్‌, ఇతర సీజేపీ మద్దతుదారులు ఒక గేటు పైనుంచి దూకి జంతర్‌ మంతర్‌ ప్రాంగణంలోకి ప్రవేశిస్తున్నట్టు ఆ వీడియోలో ఉంది.

ఆయన ఆ వీడియోకు జంతర్‌ మంతర్‌ జోలికి రావద్దు అని శీర్షిక పెట్టారు. జంతర్‌ మంతర్‌ సమీపంలోని జనతాదళ్‌(యునైటెడ్‌) కార్యాలయ ప్రాంగణం వైపు నుంచి ఆ బృందం నిరసన స్థలంలోకి ప్రవేశించినట్టు తెలుస్తున్నది. వెంటనే పోలీసులు ఆ ప్రాంతంలోకి ప్రవేశించిన వారినందరినీ అదుపులోకి తీసుకున్నారు.

పోలీసులు తమను అదుపులోకి తీసుకుంటున్నప్పుడు రాంకా, ఇతర సీజేపీ మద్దతుదారులు ఇంక్విలాబ్‌ జిందాబాద్‌, భారత్‌ మాతా కీ జై అని నినాదాలు చేస్తున్న వీడియోను కూడా దాస్‌ ఎక్స్‌లో పోస్ట్‌చేశారు. జంతర్‌ మంతర్‌ను స్వాధీనం చేసుకున్నామని ప్రకటించిన ఆయన లోపలికి ప్రవేశించడాన్ని యువతరానికి ఒక సందేశంగా అభివర్ణించారు.