యాంటిబయాటిక్స్‌కు లొంగని టైఫాయిడ్‌!

•  లాన్సెట్‌ అధ్యయనంలో వెల్లడి

న్యూఢిల్లీ, జూన్‌ 22: టైఫాయిడ్‌కు కారణమయ్యే సాల్మొనెల్లా బాక్టీరియా(ఎస్‌.టైఫీ) రోజురోజుకు మొండిగా తయారవుతున్నది. మందులకు లొంగడం లేదు. టైఫాయిడ్‌ చికిత్సలో అత్యంత కీలకమైన యాంటిబయాటిక్స్‌ను కూడా ఇది తట్టుకొని వ్యాధిని తీవ్రం చేస్తున్నది. ఈ మేరకు లాన్సెట్‌ ఓ అధ్యయనం ప్రచురించింది. 2014-2019 మధ్య కాలంలో టైఫాయిడ్‌ సోకిన 4,169 మంది రక్తనమూనాలు సేకరించి జన్యువిశ్లేషణ చేసి శాస్త్రవేత్తలు ఈ అధ్యయనం నిర్వహించారు. టైఫాయిడ్‌ చికిత్సలో ఎక్కువగా వాడే అజిత్రోమైసిన్‌ యాంటిబయాటిక్‌కు కూడా ఇది లొంగడం లేదన్నారు. కలుషిత ఆహారం, కలుషిత నీళ్ల ద్వారా సాల్మొనెల్లా శరీరంలోకి ప్రవేశిస్తుంది. టైఫాయిడ్‌ను కలుగజేస్తుంది.