Visit:
వేసవి అంటేనే ఐస్క్రీమ్ల కాలం. బండి గణ గణ వినిపించిందంటే బడి పిల్లలంతా అక్కడే ఉంటారు. ఐస్క్రీమ్ అప్పుడు ఓ అద్భుత ఆహారంలా కనిపిస్తుంది. అయితే తినేంతలోనే ఎండ వేడిమికి అది కరిగి కారిపోతూ ఉండటం ఇక్కడ అసలైన ఇబ్బంది. దీంతో ఈ చల్లదనాన్ని అరచేతుల నుంచి మోచేతుల దాకానే కాదు పిల్లల చొక్కాలూ ఆస్వాదిస్తాయి. తల్లుల్ని చిక్కులో పడేస్తాయి.
అంతమాత్రాన ఐస్క్రీమ్ను ఆమడ దూరం పెట్టేంత అవకాశమూ ఉండదు. ఇలాంటి సమస్యల నుంచి గట్టెక్కించడానికి ‘సిలికాన్ ఐస్ క్రీమ్ హోల్డర్లు’ తయారవుతున్నాయి. అరచేయంత సైజులో పువ్వులు, బొమ్మల ఆకృతుల్లో వెడల్పాటి ప్లేటులా తయారవుతున్నాయివి.
సిలికాన్తో చేసిన వీటి మధ్యలో ఐస్క్రీమ్ లేదా పాప్సికల్ పెట్టుకోవడానికి వీలుగా గుండ్రటి రంధ్రం ఉంటుంది. దాని కింద తీసి పెట్టుకునే బిరడా కూడా ఉంటుంది. తినాలనుకున్నప్పుడు ఆ బిరడా తెరిచి అందులో ఐస్క్రీమ్ కొసను ఉంచితే పట్టుకోడానికి వీలుగా సిద్ధమైపోతుంది.
ఇక కరిగిపోయే ఐస్క్రీమ్ అంతా ఆ ప్లేట్లో జమ అవుతుంది. దీంతో మీద పడుతుందన్న భయం లేకుండా ఎంచక్కా ఎవరైనా ఐస్క్రీమ్ తినొచ్చు. రంగురంగుల్లో విభిన్న ఆకృతిలో వచ్చే ఇవి ముఖ్యంగా పిల్లలకు ఎంతో ఉపయోగపడతాయి. ఇది ఉంటే ఇక ఐస్క్రీమ్ తినడం పిల్లలకే కాదు తల్లులకూ ప్రశాంతమే!
