Godavarikhani | జాతి వైరం ఓడింది.. అమ్మతనం గెలిచింది.. గోదావరిఖనిలో మానవత్వపు మనుషులను కదిలించిన అరుదైన దృశ్యం

అమ్మతనం ముందు జాతి వైరం ఓడిపోయింది. గోదావరిఖని మార్కండేయ కాలనీలో మంగళవారం ఈ అరుదైన దృశ్యం మానవత్వపు మనుషులను కదిలించింది. సహజంగా శునకం.. వానరం తారసపడితే అక్కడ ఓ యుద్ధమే జరుగుతోంది.

Godavarikhani | కోల్ సిటీ, నవంబర్ 10 : అమ్మతనం ముందు జాతి వైరం ఓడిపోయింది. గోదావరిఖని మార్కండేయ కాలనీలో మంగళవారం ఈ అరుదైన దృశ్యం మానవత్వపు మనుషులను కదిలించింది. సహజంగా శునకం.. వానరం తారసపడితే అక్కడ ఓ యుద్ధమే జరుగుతోంది. వాటి మధ్య ఉన్న జాతీ వైరం అలాంటిది. కానీ అమ్మ లేని ఓ కోతి పిల్లను చూసిన శునకంకు తనలోని అమ్మ తనమే స్పురణకు వచ్చింది. జాతీ వైరం పక్కనపెట్టి కోతి పిల్లను తన సొంత బిడ్డల అక్కున చేర్చుకుంది. జంతువులలో కూడా నిస్వార్థమైన ప్రేమ, మాతృత్వం ఉంటుందని నిరూపించింది.

మంగళవారం ఉదయం గోదావరిఖని మార్కండేయ కాలనీలోని గణేష్ నగర్ బోర్డు వద్ద కాటగలిసిన కోతి పిల్ల బిక్కుబిక్కుమంటూ కనిపించగా, అది చూసిన శునకం ఇతర కుక్కల నుంచి రక్షణ గా ఆ కోతి పిల్లను అమ్మలా తన భుజం పైకి ఎక్కించుకొని అటు ఇటు తిప్పుతూ లాలించింది. ఇది చూసిన ఓ ఫొటో గ్రాఫర్ పోచంపల్లి తిరుపతి ఆ కుక్కకు కడుపునిండా అన్నం పెట్టాడు. ఆ తర్వాత కోతి పిల్ల తో వీధుల్లో విహరింపజేసింది. ఈ దృశ్యం చూసిన స్థానికులు మాతృత్వం గొప్ప తనానికి తలవంచిపోయారు.