ఖతార్‌ గగనతలంలో అమెరికా ‘గ్యాస్‌స్టేషన్‌’ మిస్సింగ్‌!

పశ్చిమాసియా ఘర్షణల వేళ అమెరికాకు మరో ఎదురుదెబ్బ తగిలింది! ఆ దేశ మిలిటరీ విమానాలకు ఎగిరే గ్యాస్‌స్టేషన్‌గా పనిచేస్తున్న బోయింగ్‌ కేసీ-135 స్ట్రాటో ట్యాంకర్‌ ఖతార్‌ గగనతలంలో రాడార్‌తో సంబంధాలు కోల్పోయింది.

టెహ్రాన్‌: పశ్చిమాసియా ఘర్షణల వేళ అమెరికాకు మరో ఎదురుదెబ్బ తగిలింది! ఆ దేశ మిలిటరీ విమానాలకు ఎగిరే గ్యాస్‌స్టేషన్‌గా పనిచేస్తున్న బోయింగ్‌ కేసీ-135 స్ట్రాటో ట్యాంకర్‌ ఖతార్‌ గగనతలంలో రాడార్‌తో సంబంధాలు కోల్పోయింది. దుబాయ్‌లోని అల్‌ డఫ్రా ఎయిర్‌బేస్‌ నుంచి టేకాఫ్‌ అయిన ఈ ట్యాంకర్‌ పర్షియన్‌ గల్ఫ్‌ మీదుగా ప్రయాణిస్తున్నప్పుడు ఎమర్జెన్సీ సిగ్నల్‌ పంపినట్టు ఇరాన్‌ మీడియా పేర్కొన్నది. అత్యవసరంగా ల్యాండింగ్‌ చేయాల్సి వచ్చినప్పుడే అలాంటి కోడ్‌ను ప్రసారం చేస్తారని తెలిపింది.

పశ్చిమాసియా ఘర్షణల నేపథ్యంలో అక్కడ మోహరించిన విమానాలకు అవసరమైన ఇంధనాన్ని సరఫరా చేసేందుకు ఈ ట్యాంకర్‌ను అమెరికా సైన్యం ఉపయోగిస్తున్నది. దీనివల్ల ఫైటర్‌ జెట్స్‌ బాంబర్లు, ఇతర సైనిక విమానాలు ఎక్కువ గంటలు ప్రయాణించేందుకు వీలు కలుగుతుంది. తాజాగా ఈ విమానం అత్యవసర ల్యాండింగ్‌కు యత్నిస్తున్న సమయంలో కొద్దిసేపు గుండ్రంగా తిరిగినట్టు ఫ్లైట్‌ రాడార్‌24 డాటాలో కనిపించింది. ఈ ఘటనకు సంబంధించి తన ప్రమేయంపై ఇరాన్‌ ఎలాంటి ప్రకటనా చేయలేదు.