Senator | ఆమె నన్ను లైంగిక బానిసగా వాడుకున్నారు.. దావా వేసిన మాజీ ఉద్యోగి

Senator | అమెరికాలోని కాలిఫోర్నియా రాష్ట్ర సెనెటర్‌ (California Senator) మేరీ అల్వరాడో గిల్‌ (Marie Alvarado-Gil) పెను వివాదంలో చిక్కుకున్నారు. ఆమె వద్ద పని చేసిన ఓ వ్యక్తి సెనెటర్‌పై తీవ్రమైన లైంగిక వేధింపుల ఆరోపణలు చేశారు.

Senator : అమెరికాలోని కాలిఫోర్నియా రాష్ట్ర సెనెటర్‌ (California Senator) మేరీ అల్వరాడో గిల్‌ (Marie Alvarado-Gil) పెను వివాదంలో చిక్కుకున్నారు. ఆమె వద్ద పని చేసిన ఓ వ్యక్తి సెనెటర్‌పై తీవ్రమైన లైంగిక వేధింపుల ఆరోపణలు చేశారు. విధుల్లో ఉన్నప్పుడు ఆమె తనను లైంగిక బానిసగా వాడుకున్నారని సెనెట్‌ మాజీ చీఫ్‌ ఆఫ్‌ స్టాఫ్‌ ఆరోపించారు. ఫలితంగా తాను ఎంతో వేదనను అనుభవించానంటూ ఆమెపై దావా వేశారు.

2022లో అల్వరాడో గిల్‌ సెనెటర్‌గా ఎన్నికైన తర్వాత బాధిత వ్యక్తిని తన చీఫ్‌ ఆఫ్‌ స్టాఫ్‌గా నియమించుకుంది. విధుల్లో చేరిన కొన్ని రోజుల నుంచే సెనెటర్‌ తనతో వ్యక్తిగత విషయాలను పంచుకునేవారని, లైంగిక జీవితానికి సంబంధించిన విషయాల గురించి కూడా మాట్లాడేవారని బాధితుడు దావాలో పేర్కొన్నారు. ఆ తర్వాత నుంచి తనపై ఆమె లైంగిక వేధింపులకు పాల్పడ్డారని ఆరోపించారు.

తరచూ అసహజ శృంగారం కోసం డిమాండ్‌ చేసేవారని, కాదంటే బెదిరించేవారని దావాలో పేర్కొన్నారు. బలవంతంగా కోరికలు తీర్చుకునేవారని తెలిపారు. ఈ వేధింపుల కారణంగా తాను తీవ్రమైన మానసిక, శారీరక వేదనకు గురయ్యానని బాధితుడు వెల్లడించారు. వెన్నునొప్పితో పాటు వినికిడి సామర్థ్యాన్ని కోల్పోయానని అన్నారు. ఈ కారణం చెప్పి గతేడాది ఆగస్టులో ఆమె డిమాండ్లను వ్యతిరేకించినట్లు తెలిపారు.

దాంతో తన ప్రవర్తన బాగోలేదంటూ సెనెటర్‌ తనకు నోటీసులు జారీ చేశారని ఆయన ఆవేదన వ్యక్తంచేశారు. ఉద్యోగ భద్రత కోసం ఇన్నాళ్లు తాను ఈ విషయాన్ని బయటపెట్టలేదని తెలియజేశారు. అయితే శాంటాక్లాజ్‌ కాస్ట్యూమ్స్‌ వేసుకోలేదన్న కారణంగా గతేడాది డిసెంబరులో తనను విధుల నుంచి తొలగించారని తెలిపారు. తనకు రావాల్సిన వేతన బకాయిలను కూడా ఇవ్వలేదన్నారు.

తనకు జరిగిన నష్టానికిగానూ పరిహారం ఇప్పించాలని కోరుతూ శాక్రామెంటో కౌంటీ సుపీరియర్‌ కోర్టులో ఆయన దావా వేశారు. అయితే ఈ ఆరోపణలను సెనెటర్‌ కొట్టిపారేశారు. డబ్బు కోసం ఉద్దేశపూర్వకంగానే ఇలాంటి తప్పుడు ఆరోపణలు చేస్తున్నారని మండిపడ్డారు. తాను ఎవర్నీ వేధించలేదన్నారు. వాస్తవానికి ఈ సెనెటర్‌ కొన్ని నెలల కిందట లైంగిక వేధింపులకు వ్యతిరేకంగా యూఎస్‌ కాంగ్రెస్‌లో బిల్లును ప్రవేశపెట్టారు.

కాగా ఆరోపణలు ఎదుర్కొంటున్న మేరీ అల్వరాడో గిల్‌కు వివాహమై ఆరుగురు సంతానం ఉన్నారు. బాధితుడికి కూడా వివాహమైనట్లు దావాలో పేర్కొన్నారు. ప్రస్తుతం దీనిపై కోర్టు విచారణ జరపనుంది.