న్యూయార్క్: అయిదేళ్ల నుంచి 11 ఏళ్ల మధ్య వయసు ఉన్న చిన్నారులకు తమ టీకా సురక్షితమని ఫైజర్ తెలిపింది క్లినికల్ ట్రయల్స్ ఫలితాల ద్వారా ఈ విషయాన్ని తేల్చారు. అయితే ఎమర్జెన్సీ వినియోగం కోసం దరఖాస్తు చేసుకోనున్నట్లు ఆ కంపెనీ వర్గాలు పేర్కొన్నాయి. ఫైజర్-బయోఎన్టెక్ కోవిడ్ టీకా 5 నుంచి 11 ఏళ్ల మధ్య చిన్నారులకు సురక్షితంగా, ప్రభావవంతంగా ఉన్నట్లు కంపెనీ ప్రకటించింది. దానికి సంబంధించిన డేటాను ఆ కంపెనీ రిలీజ్ చేసింది. డెల్టా వేరియంట్ను కూడా స్టడీ చేశామని, పిల్లల్లో ఆ వేరియంట్ వల్ల ఉన్న భయాందోళనలకు ఫైజర్తో చెక్ పెట్టవచ్చు అని గుర్తించామని ఫైజర్ చైర్మెన్, సీఈవో ఆల్బర్ట్ బొరులా తెలిపారు.
అమెరికాలో జూలై నుంచి పీడియాట్రిక్ కోవిడ్ కేసులు విపరీతంగా పెరిగాయి. సుమారు 240 శాతం కేసులు పెరిగినట్లు గుర్తించారు. దీంతో పిల్లలకు వ్యాక్సిన్ తప్పనిసరి అన్న నిర్ణయానికి వచ్చారు. అయితే ట్రయల్స్లో 5 నుంచి 11 ఏళ్ల మధ్య వయసు ఉన్నవారిలో 2268 మందికి టీకాలు వేశారు. రెండో డోసుల రూపంలో ఈ ట్రయల్స్ నిర్వహించారు. సాధారణంగా 12 ఏళ్ల పైబడిన వారికి ఇచ్చే డోసేజ్ కన్నా తక్కువ మోతాదులో పిల్లలకు టీకాలు ఇచ్చారు. పిల్లల్లో ఫైజర్ టీకా యాంటీబాడీలను పెంచుతున్నట్లు గుర్తించామన్నారు.
ఫైజర్ కంపెనీ తమ డేటాను అమెరికాకు చెందిన ఎఫ్డీఏతో షేర్ చేసుకోనున్నది. యురోపియన్ మెడిసిన్స్ ఏజెన్సీతో పాటు ఇతర రెగ్యులేటర్లకు కూడా తమ డేటాను అందజేయనున్నది. అమెరికాలో 16 ఏళ్లు దాటిన వారికి ఫైజర్ టీకాలు ఇస్తున్నారు. కొమిర్నాటీ పేరుతో ఆ టీకాలను మార్కెట్ చేస్తున్నారు. 12 నుంచి 15 ఏళ్ల వారిలో మాత్రం ఎమర్జెన్సీ వినియోగంగా వాడుతున్నారు. 2 నుంచి అయిదేళ్లు, ఆరు నెలల నుంచి రెండేళ్ల చిన్నారులకు కూడా టీకా ట్రయల్స్ నిర్వహిస్తున్నట్లు ఫైజర్ కంపెనీ చెప్పింది.